نه دن؟
بوباغین بولبولو بیرده ن بیره لال اولدو نه دن؟
قوزقونا قارقایا جولانه مجال اولدو نه دن؟
شانلی یازکسمیشیدی قاره قیشین بوز نفسین
یازا چیخمیش صونالار غرق ملال اولدو نه دن؟
هانکی صرصر الی پرپر ائله دی گول چیچگی
بو برومند آغاجین میوه سی کال اولدو نه دن؟
بیز کی جان جان دئمه دیک اولکه ده قان قان دئینه
سئوگی منظومه سی حال اهلینه قال اولدو نه دن؟
مِیِ انگوری سؤزوم یوخ کی حرام ایدی بیزه
انسانین قانینی نوش ائتمه ک حلال اولدو نه دن؟
بیز بیلردیک کی دوغولماز یئنی دن رستم زال
یوردون حرّاجه قویان رستم زال اولدو نه دن؟
ایسته دیک سیره چیخاق ماوی سمالرده بیر آن
سیندی قُول یاندی قاناد سیر محال اولدو نه دن؟
آی کیمین آیدین یدی (عاصمه) ناحقّیله حق
پس حقین قامت موزونو هلال اولدو نه دن؟
عاصم اردبیلی
ایمیل شما بعد از ثبت نمایش داده نخواهد شد