آیریلیق اؤغور اولسون یؤلونا
بوندان سؤنرا سئومه ییندن منه نه؟
خاطیره مده گؤز یاشلارین قالاجاق
کینایه لی گولمه ییندن منه نه؟
هر گوناهی قباحتین بیلمه دین
محبّتین یولو چتین، بیلمه دین
بو سئوگی نین سعادتین بیلمه دین
بوندان سؤنرا بیلمه ییندن منه نه؟
خاطیره ن یؤخ عؤمروم بویو ساخلاییم
دیء، هارداسان، هر دن گلیب یؤخلاییم
گؤزلریمده یاش قالماییب آغلاییم
بوندان سؤنرا سیلمه ییندن منه نه؟
قؤپوب گئتدی سؤن اومیدین یارپاغی
حسرت اَکیب، درد بؤیودور تؤرپاغی
سن اؤلمادین دردلریمین اؤرتاغی
بوندان سونرا بؤلمه ییندن منه نه؟
بو سئوگی ده دوز سؤزونو گؤرمه دیم
اؤزگه اؤلدون هئچ اؤزونو گؤرمه دیم
ساغلیغیندا خوش اوزونو گؤرمه دیم
بوندان سؤنرا اؤلمه ییندن منه نه؟
نصرت کسمنلی
دردی درد اولموش ائلینده منه
آغلادیم بیر ناشی گولنده منه
هئچ کیم آغلاماسین اؤلنده منه
من هئچ واخت ، هئچ زامان اؤلمه رم داها
آزاد قارداشیم وار ، اونونلا خوشام
من گرک ساحیلی ساحیله قوشام
ایکی بؤلونمکدن ائله قورخموشــام
چؤپوده ایکی یه بؤلمه رم داها
دنیزلر دریالار منه دایازدیر
ان درین بیر چای وار او دا آراز دیر
منه گؤروش وئرین ، آزادلیق آزدیر
گؤروشسم آیریلماق بیلمه رم داها
منیم سعادتیم هارداسا ایتدی
او آسان گلمیشدی ، آسان دا گئـتدی
منه نه ائتدیسه سعادت ائتدی
بد بخت سعادته گولمه رم داها
نصرت کسمنلی
عومرومدن بیر آنی اوغورلامیشیق
قاچیب بؤلوشوروک بو خلوت یئرده
پاییزدان آیریلان کوچه ری قوشوق
کیم بیلر بلکه ده گؤروشدوک بیرده
بؤشالیر اوره یین دولور گؤزلرین
کئچیتمیش زامانی لعنت له ییرسن
دولاشیب دیلینده قالیر سؤزلرین
اؤزونده بیلمیرسن نه ایسته ییرسن
اؤرتور گؤزلرینی یوخو خوماری
یوخون ساچین کیمی قاریشیق دوشور
فیکیرلی کئچیرسن ، بوگون یوللاری
|
سن سیز ائله بیلمه اؤله جه یه م من قارا بیر کدره دؤنه جه یه م من گئجه لر یوخونا گله جه یه م من سن منی اونودا بیلمه یه جک سن عمرونده ناراحات ایزیم قالاجاق آلووم سؤنسه ده کؤزوم قالاجاق آرخانجا همیشه گؤزوم قالاجاق سن منی اونودا بیلمه یه جک سن سن ائله بیلمه کی غمدن اوزاقسان عمرونو گونونو اودوزاجاقسان اؤزونو بلکه ده اودوزاجاقسان سن منی اونودا بیلمه یه جک سن منی اونوتماغا عینادین کیمی ایلک سئوگی آغریسی ، فریادین کیمی لاپ اؤز آدین سوی آدین کیمی سن منی اونودا بیلمه یه جک سن نصرت کسمنلی |
بوقاتار وصالدان حسرته گئدیر،
وطن اوره ییمد ن غربته گئدیر.
دئیه سن آیری بیر قیسمته گئدیر،
نه اولار،ساخلا یین گئدن قاتاری.
گولوشوآپاریر،گؤزیاشیم قالیر،
اوره ییم بوشالیر،گؤزلریم دولور.
بو قاتارآیریلیق هاواسی چالیر،
نه اولار،ساخلایین گئدن قاتاری.
زامانی دوغراییب بیچیر بوقاتار،
سئوگیمین اوستوندن کئچیر بوقاتار.
منیم گؤز یاشیمی ایچیر بوقاتار،
نه اولار،ساخلایین گئدن قاتاری.
یویورسم،چاغیرسام چاتا بیلمه رم،
قلبیمدن قوپاریب،آتا بیلمه رم،
گئتدی می؟ بیر داها توتا بیلمه رم ،
نه اولار،ساخلایین گئدن قاتاری.
منیم باهاریمی آپاریب گئدیر،
الینی الیمدن قوپاریب گئدیر.
قویمایین یاریمی آپاریب گئدیر
نه اولار،ساخلایین گئدن قاتاری.
نصرت کسمنلی
بوعشقین یاسینی ساخلایاجاغام ،
سن گئدن یوللارا باخمایاجاغام .
آغلاسام گیزلیجه آغلایاجاغام .
منیم گؤز یاشیمی گؤرمه یه جکسن.
طالع اویونلارا آتاجاق سنی،
فریادین گؤیلره چاتاجاق سنین.
گوناهین گؤزونو توتاجاق سنین،
منیم گؤز یاشیمی گؤرمه یه جکسن.
او گولن شکلینه باخیب آغلاسام،
گؤزومه بیرعینک تاخیب آغلاسام.
اوزومو اووجوما سیخیب آغلا سام،
منیم گؤز یاشیمی گؤرمه یه جکسن.
سن ائله بیلمه کی،غمدن اوزاقسان،
بیر یاغیش آلتیندا سؤنن اوجاق سان.
اوزومه باخماغا اوتاناجاقسان ،
منیم گؤز یاشیمی گؤرمه یه جکسن.
نصرت کسمنلی