چکه جم

بیر ائلی بوراندا قاردا چکه جم

بیرائلی باهاردا واردا چکه جم

بیر شکیل چکه جم گوزگیله سینه

آرزیلار دوزوله سیل سیله سینه

بیر باهار سالاجام قیش چیله سینه

بیر لالا خونچاسین قاردا چکه جم

بیر داغی چکه جم دومان ایچینده

بیر یاخشی بیتره م یامان ایچینده

بیر حققی دوغرولدام گومان ایچینده

شاختادا بیر آغاج باردا چکه جم

بیر سئلی چکه جم سارا قوینوندا

بیر ائلی یاردیم سیز یارا قوینوندا

بیر دیلی دیلچک سیز داردا چکه جم

تیکیلی بیر آغیز چکه جم بوما

بیر درین باخیش کی فیکیره جوما

یوللایام شکیلین تهرانا قوما

بیر ائلین یوخلوقون واردا چکه جم

بیر ایشیق چکه جم اوزاقدان آتیب

بیر دنیز چکه جم دنیزه باتیب

بیر ائلی چکه جم مین ایلدی یاتیب

وارلیغین بیلمیره م هاردا چکه جم

نیله ییم دیل سیز بیر باش چکه نمیرم

ائلیمین گوزونده یاش چکه نمیرم

بو ائلین ماهنی سین تاردا چکه جم

ائلیمی باهاردا واردا چکه جم

هوشنگ جعفری

کوسموشم

دوزموشوم اول قدر هجرانه دوزومدن کوسموشم

اوزموشم امید وصلتدن اوزومدن کوسموشم

اویموشام ایللر بو ظاهربین گوزون فتواسینه

اَیری لر دوز گورموشم، از بس گوزومدن کوسموشم

گورموشم چون مصلحت چنگنده طبعیم رام اولور

ائلدن الهام آلدیغیم شیرین سوزومدن کوسموشم

تکجه عاصم سونمه ییر سینه مده عشقین آتشی

سانما بئش گونلوگ سمندر تک کوزومدن کوسموشم

عاصم اردبیلی

قدرینی بیلمز

فراقی چکمه ین عاشیق، وصالین قدرینی بیلمز

جمیله اولمایان واصیل، جمالین قدرینی بیلمز

شب اسراده قوسینین ایکی نصف ائیله دی آیی

بو معجزدن اولان غافیل، هلالین قدرینی بیلمز

دوداغین سلسبیلیندن خبردار اولمایان جانسیز

اونون ماهییتی اود دور، زلالین قدرینی بیلمز

مدور نقطه ی خالون، ببک دن عینینه قوندی

ببک سیز قالسین اول گوزکی بو خالین قدرینی بیلمز

نهالون اعتدالیندان، اوتانار سدره و طوبی

بو قدی بنزه دن سروه، نهالین قدرینی بیلمز

سنی سندن دیلر کونلوم، نه دونیانین زر وگنجین

کی اول مالی سئون جانسیز، بو مالین قدرینی بیلمز

اوزوندور پرده آللاهین یمینی، کعبه سی، بیتی

یمینی بیلممیش هر کیم شمالین قدرینی بیلمز

گونش ماه تمامیندن زواله اوغراشور هر گون

نه دن شول آفتابی بی زوالین قدرینی بیلمز

لب لعلون وصالیندان جدا اولماق منه دوشمز

بو ذوقی بیلمه ین صوفی، بو حالین قدرینی بیلمز

"نسیمی" صوفی دگیشمز غموندن گئیدیگی شالی

کی اول صوفی صفاسیزدور بو شالین قدرینی بیلمز

مولانا نسیمی

آتا بابا سوزلری ۸

 ائله تیکه گؤتور کی ، اودا بیلَسن

ائله دون گئیمک گرک کی ، یاماغی ائوده تاپیلا

ائله سؤز دئه کی ، کالی تؤکولسون دَیمیشی قالسین

ائله سؤز دئییر کی ، پیشمیش تویوغون گولمگی گلیر

ائله قازانین بئله ده آشی اولار

اؤیرنمَیه عار اولماز

اؤیودو آلمایانا وئرلر

اائله چؤمچه نین بئله ده قازانی اولار

احتیاج انسانس هر ایشه قویار

ارز ایشینی اؤزون گؤر

ارکوزو اولانا یول گؤسترن چوخ اولار

اغاج بهشتدن چیخیب

اکینچی نین اومودو اکینه دیر

او قدر درد چکیب قارنی دومبولا( دؤهول) دؤنوب

اوبا ییه سیز قالاندا دونوز تپَیه چیخار

اوبات کؤپکسیز اولماز

اوتا قاتسان آت یئمز، اته قاتسان ایت یئمز

اوتنجاغین ائششگین قورد یئیر

اوجاق ایچیندن توتوشار

اوجاق کئچر ، کولو قالار

اوجاق یئری کولوندن معلوم

اوجاقدان کول اکسیک اولماز

اوجوزلو اتین شورباسی اولماز

اوچ ائششک بیر آخیردان آرپا یئمز

اوچ تومنلیک ائششگین اون بئش قیرانلیق قودوغو اولار

اوچوق ائو خرابه سیندن بللی اولار

اوخ کیمی دوغرو اولسان الده توتارلار سنی، یای کیمی اَیری اولسان چؤله آتارلار سنی

اوخ یارادان چیخار ، عداوت اورَکدن چیخماز

اوخویان یاشا باخماز

اودلا اوینایانین اوّل  آخیر الی یانار

اودونا گئدنین بالتاسی ایتی اولار

اورتا اویونو آورتا یئرده اوینارلار

اورتاق چوخ اولدوقجا زیان آز اولار

اورَک اؤز دوستونو تانییار

اورک بیر شوشه دیر، سیندیرسان  یاماماق اولماز

اورَک دنیزدن دَریندیر

اورَک قولاق دئییل کی ، بارماقلا قوردالایاسان

اورَک کی وار شوشه دیر، سیندیرسان کیم یامار؟ !

اورَک یانارر ، گؤزیاشارار

ورَک یانماسا ، گؤزدن یاش چیخماز

اورَکدن اورَگه یول وار

اورَگیمین داشقینینی آغیز دئیر

آدی قویارلار « رمضان » اوروج توتمایانین اوغلونا

اوزاق یئرین آرپاسیندان یاخین یئرین سامانی یاخشیدیر

اوزاقدان باخانا داعوا آسان گؤرونر

اوزاقلاشماق یاخینلاشماقاوچون واسیطه دیر

ناز ایله میسن!

چوخلار انجیکدی کی، سن اونلارا ناز ایله میسن

من ده اینجیک کی، منیم نازیمی آز ایلمه میسن

ائتمیسن نازی بو ویرانه کؤنولده سلطان

ائوین آباد اولا، درویشه نیاز ایله میسن

هر باخیشدا چالیبان کیپریگی مضراب کیمی

بیر قولاق وئر بو سینیق قلبی نه ساز ایله میسن؟

باشدان آچ یایلیغی افشان ایله سوسن- سنبل

سن بیزیم بایراممیزسان قیشی یاز ایله میسن

سن گون اول، قوی غم میز داغدا قار اولسون، اریسین

منیم آنجاق ایشیمی سوز و گداز ایله میسن

من بو معناده غزل یازمالی حالیم یوخدی

سن جوجوق تک قوجانی فرفره باز، ایله میسن

کاکلی باشدا بوروب باغلامیسان تاج کیمی

او قیزیل ساچدان اونا، گوللی قوتاز ایله میسن

سینه بیر دشت مغان دیر، قوزی یان- یانه یاتیب

منیم آغلار گوزومی اوردا آراز ایله میسن

بو گوزللیک کی جهاندا سنه وئرمیش تانری

هر قدر ناز ائله سن ایله، کی آز ایله میسن

من بو سوز یله آتدین، آرالاندین بیلیرم

آرانی بیر پارا نامردیله ساز ایله میسن

دستماز ایله دیگین چشمه،مسیحا قانی دیر

بیلمیرم هانسی کلیساده نماز ایله میسن؟

من«عشیران» اوخوسام، پنجه«عراق» اوسته گزه ر

گوزلیم، «ترک» اولالی، ترک «حجاز» ایله میسن

تازا شاعر، بوده نیز هر نه باخیرسان دیبی یوخ

چوخ اوزاتسان بوغازی، اوردهگی قاز ایله میسن

بسکه زلف و خط خالین قوپالاغین گؤتدون

زلفعلی نین باشینی آزقالا داز ایله میسن

گل! منیم ایسته دیگیم کعبه ییخیلماز، اوجالار

باشدادا کژ گئده سن، دیبده تراز ایله میسن

خط و خالیندن آلیب مشقیمی قرآن یازارام

بو حقیقت له منی، اهل مجاز ایله میسن

منی، دان اولدوزی، سن یاخشی تانیرسان که سحر

افقی خلوت ائدیب رازو نیاز ایله میسن

«شهریار»ین داغیلیب، داغدا داشا دالدالانیب

ئوزون انصاف ایله، محمودی ایاز ایله میسن

استاد شهریار

گوزلرینین قاره سینه!

سوگیلیم زولفون توکوبدور گینه اول شانه سینه

قوربانام زولفونه هم زولفو گزه‌ن شانه سینه

گئجه گوندوز گزرم دلبریمین کویینی من

...چونکی یوخ منده لیاقت گئدم اول خانه سینه

دالیسیجان دوشرم فیکر و خیال ایلیه‌رم

دوشجکدیر پس هاچان سایه‌م اونون سایه سینه

حوری جنت ده گرک دیر گورورم حوری‌نی من

تا کی گوزلر ساتاشیر گوزلرینین قاره سینه

دوزدی غمزه اوخونون یاره‌سی کار ائتدی منه

لاکین آرزوم بو دی کی مرهم اولوم یاره سینه

من گونش اولسام اگر سنده گرک مهپاره

چونکی یئتمز اول گونش سئودیگی مهپاره سینه

الهامی علمداری

دوستلار گوروشو.......................

دوستلار گوروشونه آنا یوردومدان

کونول بوقچاسیندا سوز گتیرمیشم

ادب باغچاسیندا سولماز گوللره

آراز کیمین آغلار گوز گتیرمیشم

دالغالی دنیز تک جوشوب چاغلایان

ائلر یاراسینی آچیب باغلایان

چئوریب بولودا قان یاش آغلایان

شعریزه بیر چیمدیک دوز گتیرمیشم

اولو بابالاردان یادگارلارا

عاشیقلار جمعینده بسته کارلارا

تایسیز ایگیدلره وورغون یارلارا

منده بیر وورغونام اوز گتیرمیشم

شعرین اوجاغیندان قالخان کوزلره

اوزون گئجه لرده اویاق گوزلره

سینه لر یاتاغی اودلو سوزلره

سولطان ساوالاندان بوز گتیرمیشم

وورغونام او آیدین گئتدیگیز یولا

نه ساغا باغلی سیز نه ده کی سولا

گلمیشم سیزیلن وئرم قول قولا

خورجوندا نه ییم وار دوز گتیرمیشم

محبت ایپه گین آچیب سرمه گه

کونلوزون آغری سین بر آز درمه گه

ظولماتا گونش تک سینه گرمه گه

یانیقلی سازیمدا کوز گتیرمیشم

ائشیتدیم سوز قیزین بوردا آلان وار

عاصیمین باغیری تک داردا قالان وار

غزل باغچاسیندا نغمه چالان وار

قارا تئل سارا تک قیز گتیرمیشم

من آنا یوردومون بیر دیلمانجی یام

بیر جوما آرزی یام، شعرم، سانجی یام

دنیزلر اونونده ایتگین دامجی یام

گونشه دیرماشان توز گتیرمیشم

اوستادعاصم

نه دن؟

بوباغین بولبولو بیرده ن بیره لال اولدو نه دن؟

قوزقونا قارقایا جولانه مجال اولدو نه دن؟

شانلی یازکسمیشیدی قاره قیشین بوز نفسین

یازا چیخمیش صونالار غرق ملال اولدو نه دن؟

هانکی صرصر الی پرپر ائله دی گول چیچگی

بو برومند آغاجین میوه سی کال اولدو نه دن؟

بیز کی جان جان دئمه دیک اولکه ده قان قان دئینه

سئوگی منظومه سی حال اهلینه قال اولدو نه دن؟

مِیِ انگوری سؤزوم یوخ کی حرام ایدی بیزه

انسانین قانینی نوش ائتمه ک حلال اولدو نه دن؟

بیز بیلردیک کی دوغولماز یئنی دن رستم زال

یوردون حرّاجه قویان رستم زال اولدو نه دن؟

ایسته دیک سیره چیخاق ماوی سمالرده بیر آن

سیندی قُول یاندی قاناد سیر محال اولدو نه دن؟

آی کیمین آیدین یدی (عاصمه) ناحقّیله حق

پس حقین قامت موزونو هلال اولدو نه دن؟

عاصم اردبیلی

هرزه سؤز سؤیله ینه یاخشی جواب سوسماقدیر

او آجی سئوزلره صبرائیله یرک دؤزدوم من

چون کمال اهلی اولان ناکام اولور سئزدیم من

هرزه سؤز سؤیله ینه یاخشی جواب سوسماقدیر

سوساراق های قوپاران هرزه دیلی اؤزدوم من

کاما چاتماق دیله یرسن ائلی چاتدیر کامینا

بونو گؤردوم هارا گئتدیم هارانی گزدیم من

اودیله سن مومو بیر یئرده نئجه ساخلایاسان؟

آتشیمله پولادی موم کیمی بیل ازدیم من

اونودوبلار سنی صائب یادا سالماز کیمسه

دردیمی لعلیله داغ سینه سینه یازدیم من

صائب تبریزی

دریا ائله دیم

ترکی بیر چشمه ایسه، من اونی دریا ائله دیم  

بیر سویرق معرکه نی محشر کبرا ائله دیم  

 بیر ایشیلتیدی سها اولدوزی تک گورسنمز  

 گوز یاشیلما من اونی عقد ثریا ائله دیم  

 امیدیم وار که بو دریا هله اقیانوس اولا  

اونا ضامن بو زمینه که مهیا ائله دیم

 عرفانا چاتماسا شعر و ادب ابقا اولماز   

 من ده عرفانه چاتیب شعریمی ابقا ائله دیم

 ابدیتله یاناشدیم دوغولا حافظه تای    

 شیرازین شاهچراغین تبریزه اهدا ائله دیم 

 ترکی نین جانینی آلمیشدی حیاسیز طاغوت    

من حیات آلدیم اونا، حق ایچون احیا ائله دیم

 (فیض روح القدس) اولدی مددیم حافظ تک

من ده  حافظ کیمی اعجاز مسیحا ائله دیم  

 قمه قداره لر آغزیندا دیل اولمیشدی سوگوش

 من سه وینج ائتدیم اونی، خنجری خرما ائله دیم

 ایندی گویلرده گوزل صفله صفا ایله گزیر 

منجلابلاردا اوزن اردگی دورنا ائله دیم    

باخ که(حیدر بابا)افسانه تک اولموش بیر قاف    

من کیچیک بیر داغی سر منزل عنقا ائله دیم   

 بوردا(روشن ضمیرین)ده هنرین یاد ائده لیم    

من اون دا قلمین طوطی گویا ائله دیم 

نه تک ایراندا منیم ولوله سالمیش قلمیم  

 باخ که ترکیه ده، قافقازدا نه غوغا ائله دیم

 باخ که تهراندا نه شاعرلری شیدا ائله دیم   

 هم(سهندیه) سهندین داغین ائتدی باش اوجا   

 هممن ئوز قارداشیمین حقینی ایفا ائله دیم 

 آجی  دیللرده شیرین ترکی اولوردی حنظل

 من شیرین دیللره قاتدیم اونی حلوا ائله دیم    

هر نه قالمیشدی کئچنلردن اونا بال پتگی   

اریدیب موملو بالین شهد مصفا ائله دیم   

 ترکی، واللاه، آنالار اوخشاغی، لایلای دیلی دیر    

دردیمی من بو دوا ایله مداوا ائله دیم  

شهریار، حیف ساووخدیر بو دگیرمان هله ده    

دارتماغا یوخدی دنی، من ده مدارا ائله دیم  

اوستاد شهریار

گل

فرقتوندن یاندی باغریم اوره گیم قان اولدی گل

گل کی رخسارون بو مرده جسمه جان اولدی گل

دونیانین ناز و نعیمی، باغ و بستانی منه

سنسیز ای سولطان خوبان بند و زندان اولدی گل

ایستدی لعلین فراقی جانیمی یاخماق ولی

شوقه یانمیش جانه لعلین آب حیوان اولدی گل

اول کونول کی دایمن ایشی سنونله وصل ایدی

یاندی شوقوندان اسیر درد هجران اولدی گل

جانیمین جانی وصالیندور وصالوندان اونی

تا کی اییردی فلک بیچاره بیجان اولدی گل

عاشقین باغ و گولستانی اوزون گلزاریدیر

هانسی گولزارین گولی گول سوز گولیستان اولدی گل

جنتین صحنینده طوبی واله و حیران و مست

قامتون حسنونده ای سرو خرامان اولدی گل

تا منی تقدیر یزدان ایله دی سندن جدا

کونلومون حالی پریشان دیده گریان اولدی گل

معجزاتوندان یاناغون، محکماتوندان ساچون

خار و خاشاکی جهانین ورد و ریحان اولدی گل

بحر بی پایانه شوقون جانیمی غرق ایله دی

گؤر نه بیداد ایله دی هجرون نه طوفان اولدی گل

بو نسیمی سندن آیری بیلدیگیم یوخدور وجود

درد و درمان، وصل و هجران، جمله یکسان اولدی گل

نسیمی

فصل نو باهار

ساقیا دولدور قدح چون یئتدی فصل نو باهار

مرغزار اولدی چمن سویله ر چمنده مرغ زار

گول چمنده پادشاه اولدی بزتدی مجلسی

لاله گلدی قوللوغا توتدی شراب خوشگوار

صبحدم بستانه ساری گل گشت اوچون عزم ائیله دیم

باغچادا گوردوم کی چیخمیش بیر حبیب گلعذار

دیشی اینجو، گوزی جادو، خالی هندو، بئلی مو

ساچی سنبل، خالی فلفل، اوزی چون گل، آغزی دار

خوب منظر، گوزی کافر، کیپریگی خنجر، قاشی یای

قد صنوبر، بویی عرعر، لاله ی تر، شول نگار

یوزی نون و گوزی عین و اوزی ری قامت الف

ساچی جیم و خالی میم و یوزی نقطه خط غبار

دلبریم بیر قیل بهاسی قیمتی دورد اقلیمه

بیری مصره، بیری چین و بیری هند و بیری لار

معرفتدن کوثر اولدی هم «نسیمی» چاکری

نسبتی یوخدور اونونلا عین دین و اختیار

  مولانا نسیمی

آتا بابا سوزلری ۷

اؤردک گلیب قاز اولماز، گلین گلیب قیز اولماز

اؤردَگی باغلاماغا ایپک گرک ، یار ایله اویناماغااورَک گرک

اؤردَگی سو ایله قورخوتمازلار

ائرمنی دن شاهید ایستَدیلر ، اوزوم آیاقلایان گتیردی

اؤز آدینی اؤزگه لره قویما

اؤز اؤزونه ائیلَیَنه چاره یوخدور

اؤز ائولرینین تولکوسو ، اؤزگه ائوینین آسلانی دیر

اؤز ائویمین نؤکرییَم ، اؤزگه ائوینین  آغاسی

اؤز ائوینده اؤز باشینی باغلایا بیلمیر ، اؤزگه ائوینده گلین باشی باغلاییر

اؤز چؤرَگینی اؤزگه سوفره سینده یئمه

اؤز عاغلینی اؤزگه عاغلینا وئرمه

اؤز قدرینی بیلمَیَنین قدرینی اؤزگه سی ده بیلمز

اؤز قورو چؤرَییم ، اؤزگه نین پیلوووندان  یاخشیدیر

اؤز کؤوشنینده اوتلایان مال آج قالماز

اؤز گؤزونده بایقوشون بالاسی ، تاووس قوشوندان دا گؤزلدیر

اؤز گؤزونده تیری گؤرمور، اؤزگه گؤزونده قیل سئچیر

اؤز گؤزونده دیرَگی گؤرمور، اؤزگه گؤزونده چؤپو گؤرور

اؤزو عدالتلی اولانین قاضییا احتیاجی اولماز

 اؤزو قازانمایان مال قدرینی بیلمز

اؤزو ییخیلان آغلاماز

اؤزون باخما سؤزونه باخ

اؤزوندن قوّتلی ایله آیاق چکمه

 اؤزونده اولمایاندا قونشویا گئدرسن ، قونشوندا اولمایاندا هارا گئدرسن ؟

اؤزونو یاستا بیلسن ، یولداشینی اؤلموش بیل

اؤزونو باشقاسینا نردیوان ائیلَمه

اؤزونه حرمت قویمایان ، اؤزگَیه ده حرمت قویماز

اؤزونه قییمادیغینی ، اؤزگیَه ده قییما

ائششک نه بیلیر زعفران نه دیر؟

اؤکوز اؤزونه یونجا اَکنده باشی آغرییار اؤکوز اؤلدو، اورتاق آیریلدی

اؤکوز اؤلر گونو قالار، ایگید اؤلر اونو( شهرت) قالار

اؤکوز اؤلمَیینجه اینگه قیمت اولماز

اؤکوز اولاجاق دانا پوخوندان بیلینر

اؤکوزو اولانا بورج گون وئرلر

اؤلموش آتا یوک چاتمازلار

اؤلموش آسلانا دووشانلار دا هجوم ائیلر

اؤلموش آسلاندان دیر کؤپک یاخشیدیر

اؤلموش دوه نین دریسی بیر ائششگه یوکدور

اؤلَنین بورجونو باققال دیریلره یوکلر

اؤلو آسلانین ساققالینی یولارلار

اؤلوسو اولان بیر گون آغلار ، دلیسی اولان هر گون آغلار

اؤلوم وار آرلوم کیمی ، اؤلوم وار ظولوم کیمی

اؤلونو بیر دفعه یویارلار

اؤلونون وصیّتی اؤزو ایله گئدر

ائله ائیله کی ، بیرده بازارا شور ساتان گلسین

ائله ایش توت کی، ایچیندن قنبر قولو چیخماسین

ائله باغین بئله ده مئیوه سی اولار

بوقاتار وصالدان حسرته گئدیر

بوقاتار وصالدان حسرته گئدیر،

وطن اوره ییمد ن غربته گئدیر.

دئیه سن آیری بیر قیسمته گئدیر،

نه اولار،ساخلا یین  گئدن قاتاری.

گولوشوآپاریر،گؤزیاشیم قالیر،

اوره ییم بوشالیر،گؤزلریم دولور.

بو قاتارآیریلیق هاواسی چالیر،

نه اولار،ساخلایین گئدن قاتاری.

زامانی دوغراییب بیچیر بوقاتار، 

سئوگیمین اوستوندن کئچیر بوقاتار.

منیم گؤز یاشیمی ایچیر بوقاتار،

نه اولار،ساخلایین گئدن قاتاری.

یویورسم،چاغیرسام چاتا بیلمه رم،

قلبیمدن قوپاریب،آتا بیلمه رم،

گئتدی می؟ بیر داها توتا بیلمه رم ، 

نه اولار،ساخلایین گئدن قاتاری.

منیم باهاریمی آپاریب گئدیر،

الینی الیمدن قوپاریب گئدیر.

قویمایین یاریمی آپاریب گئدیر  

نه اولار،ساخلایین گئدن قاتاری.

                                نصرت کسمنلی

بوعشقین یاسینی ساخلایاجاغام

بوعشقین یاسینی ساخلایاجاغام ،

سن گئدن یوللارا باخمایاجاغام .

آغلاسام گیزلیجه آغلایاجاغام .

منیم گؤز یاشیمی گؤرمه یه جکسن.

طالع اویونلارا آتاجاق سنی،

فریادین گؤیلره چاتاجاق سنین.

گوناهین گؤزونو توتاجاق سنین،

منیم گؤز یاشیمی گؤرمه یه جکسن.

او گولن شکلینه باخیب آغلاسام،

گؤزومه بیرعینک تاخیب آغلاسام.

اوزومو اووجوما سیخیب آغلا سام،

منیم گؤز یاشیمی گؤرمه یه جکسن.

سن ائله بیلمه کی،غمدن اوزاقسان،

بیر یاغیش آلتیندا سؤنن اوجاق سان.

اوزومه باخماغا اوتاناجاقسان ،

منیم گؤز یاشیمی گؤرمه یه جکسن.

نصرت کسمنلی