آتابابا سوزلری۱۰
ایت یاتار قارا آغاج کؤلگه سینده دئیر بس اؤز کؤلگه سیدیر
ایت یاتار قایا کؤلگه سینده ، دئیر بس اؤز کؤلگه سیدیر
ایت ییه سینی تانیمیر
ایت ییه سینی تانییار
ایتی چؤرک تندیردن ، منّتی یوخ پندیردن
ایتی ییه سینه تانیتدیریر
ایتیب، آختارانی یوخدور
ایرمی گلیری اولوب، ایرمی بیرخرجی اولانین وای حالینا
ایرمیسینده یئل چکن ، آلتمیشیندا سیزلار
ایستَدی قایشن دوزلده ووردو ، گؤزون چیخارتدی
ایستی سئون توستوسونه دؤزر
ایستَییرسن قوجالیقدا حرمتین اولسون ، جوانلیقدا قوجالار حرمت ائیله
ایشی باشلامامیش آخیرینی دوشون
ایگید اؤلر آدی قالار، مخنّثین نه یی قالار؟
ایگید اؤلر اونو شهرت قالار ، اؤکوز اؤلر گونو قالار
ایگید اودور، آتدان دوشوب آتلانا ، ایگید اودور، خر عذابا قاتلانا
ایگید اودورکی، آپاردیغینی گتیرسین
ایگید اوغول جوان ائیلر آتانی
ایگید اوغول دوشمنه اَییلمز
ایگید ایلقاریندان دؤنمز، دوه اووساریندان
ایگید باسدیغین کسمز
ایگید جانلی ، کباب قانلی
ایگید قووغاسیز اولماز
ایگید لقبله تانینار
ایگید لیگین ده یئری وار
ایگید مئیداندا معلوم اولار
ایگید یارسیز اؤلمز
ایگید یوز یاشار، فرصت بیر دوشر
ایگیده هونرینه گؤره آد وئررلر
ایگیدی یاخشی ساخلار، یاخشی آرواد ، یاخشی آت
ایگیدیم ایگید اولسون ، کول دیبی ائویم اولسون
ایگیدین الی ایشده گرک
ایگیدین ایگیددن احتیاطی آرتیقدیر
ایگیدین باشی قالدا گرک !
ایگیدین خنجری قینیندا قالماز
ایگیدین منزیلی بیر اولار ، نامردین منزیلی اولماز
ایل باهاریندان بیلینر
ایل وار بیر گونه دَیر، گون وار بیر ایله دَیر
ایل وار بیر گونه دَیمز، گون وار بیر ایله دَیر
ایلان آدامین توپوغونوگؤزلر، آدام ایلانین باشینی
ایلان آغزیندان قورتاردی ، قورباغا آغزینا دوشدو
ایلان آغزیندان قورتولوب ، اَژدها آغزینا دوشدو
ایلان آیاغی ، قاریشقا گؤزو، موللا چؤرَگی، کیم گؤروب؟
شعله ی شمعه اؤزون رسمدی پروانه ویرار
او سر زولفووه مشّاطه، پری شانه ویرار
چوخ ستمگردی پریشانی پریشانه ویرار
گؤرورم قتلیمه آماده دی جلاد گؤزون
تُرک بد مست تک، ال خنجر برّانه ویرار
حلقه زولف گره گیری ده باغلاندی کؤنول
اؤز اؤزون گؤر نئجه زنجیره بو دیوانه ویرار
لوح رخساریوی دوتموش او خطا کار خطون
قویما بیگانه الین سیب زنخدانه ویرار
آلمیسان یانوه گؤردوم گئجه رؤیادا منی
اؤزوم اؤز بختیمی بوللم، بو یوخی یانه ویرار!
لبلرون فکری منه قوت دل اولسا نه عجب
طعنه یاقوت لبون لعل بدخشانه ویرار
شیخ صنعان کیمی هرکیمسه سنی گؤردی دئدی:
عاقبت رخنه بو ترسا بچه ایمانه ویرار
ناوک غمزون ایچر قانیمی ای قاشی کمان
چشم مستون کیمی مخموردو، پیمانه ویرار
یانارام آتش هجرانووه باک ائیلمرم
شعله ی شمعه اؤزون رسمدی پروانه ویرار
زاهدون کفرینه عشقیم وئری فتوای صریح
کافر عشقه باخون، طعنه مسلمانه ویرار!
وار امیدیم سالا صراف اله بیر سرمایه
صراف تبریزی
خان ننه
خان ننه، هایاندا قالدین
بئله باشیوا دولانیم
نئجه من سنی ایتیردیم!
دا سنین تایین تاپیلماز
سن أولن گون، عمه گلدی
منی گتدی آیری کنده
من اوشاق، نه آنلیایدیم؟
باشیمی قاتیب اوشاقلار
نئچه گون من اوردا قالدیم
قاییدیب گلنده،باخدیم
یئریوی ییغیشدیریبلار
نه أوزون، و نه ده یئرین وار
.
.
.
تب عشق
چشم سیه یار دل پیر ایلن اوینار
آهوی خطا دیدیه باخ شیر ایلن اوینار
سالمیش اوزه تک خالینی یاندیرسین حریفی
لیلاج دغل بازدی تدبیر ایلن اوینار
آئینه ده اؤز عکسینه یاریم اولوب عاشیق
صورتگره باخ چکدیگی تصویر ایلن اوینار
صبریم کسیلیر عُمر آزالیر محنتیم آرتار
فوج مژه تا غمزه، پی پیر ایلن اوینار
روحیم اوچار از بس کی سیزیلدار دلِ زاریم
مطرب کیمی دستگاه بم و زیر ایلن اوینار
اویناتماغا یوخ زولفون اگر اولما مکدّر
دیوانه اولان حلقه ی زنجیر ایلن اوینار
مستانه گؤزون اوینادا قاش، ائتمه ملامت
میخانه ده هر کیم قالا شمشیر ایلن اوینار
تؤک خنجر ناز ایله قیزیل قانیمی، دورما
صیاد هاچان توتدوغو نخجیر ایلن اوینار؟
چوخ ائیلمه پیچ و خم و دستاریله بازی
قورخام دیه لر فتنه دی تزویر ایلن اوینار
اوینار تب عشق ایله وجودوم گئجه گوندوز
صراف دی گویا غم اکسیر ایلن اوینار
صراف تبریزی
غم یئمه!
ماه کنعانین باتیب، ای پیر کنعان، غم یئمه!
تا گلستانین اولوبدور بیت احزان، غم یئمه!
ای دل محنت زده، اول شاد، لبریز سرور
کسب نامردی قیلار افکار وجدان، غم یئمه!
اولمادی مقصودیمیزجه دور چرخ کج مدار
قالمالی دیر بئیله حالت اوزره دوران پایدار
قسمتیندیر، ائتگیلن هم روز و شب ناله، زار
ای رعیت، ای فقیر و فعله، دهقان، غم یئمه!
صبح تئزدن دور آیاغا، شامه تک چک زحمتی
گوجلولردن ده ائشیت هر نوع فحش و تهمتی
سن ذلیل اول، عیبی یوخ، قوی گوجلو چکسین لذتی
قوی سنی خوار ائیله سینلر خان و اعیان، غم یئمه!
ایشله قوی قدین بوکولسون، ایشله، آلنین ترله سین!
ایشله، آج قال، آج بهایم تک عیالین چرله سین
ظلمدن فریاد و دادی قوی دیلین ازبرله سین
غارت ائتسین روزینی ملا و بگ، خان غم یئمه!
چک گیلن عمرون چاتینجا، بینوا، آه و فغان
بئیله پنهان سرّیلر اولماز سنه هرگز بیان
ملا نصر الدین، «لسان الغیبه» اولدون ترجمان
روح پاکندیر سنین هر دم ثنا خوان، غم یئمه!
میرزا علی اکبر صابر
وای، وای، نه یامان مشکله دوشدی ایشیم، الله!
وای، وای، نه یامان مشکله دوشدی ایشیم، الله!
فریادیمه یئت کیم، یانیرام آتشه، بالله!
اسلامه خلل قاتمادادیر بیر نئچه بدخواه
ایسترلر اولا بنده لرین طاغی و گمراه
ائتدیم نه یامان عصره تصادف، آمان ای وای
لا حول و لا قوة الا بالله!
مکتب لر آچیب ائیله یین احسانی- دئییرلر
مکتبده قویون «اوستولو»، داسقانی- دئییرلر
پر پوچ ائله یین چوب فلقانی- دئییرلر
دیشره چیخارین حضرت ملانی- دئییرلر
ملا قاوولا، یعنی معلم گله واه!... واه!...
لا حول و لا قوة الا بالله!
من آنلامیرام کیم، نولا معنای معلم
قیرخ- اللی منات پول آلا هر آی معلم
بیر تازه اصوله اولا ایفای معلم
پوللاری آلا، سؤیله یه، اوخفقای معلم
ملا اونا حسرتله چکه کوچه ده آه!...آه!...
لا حول و لا قوة الا بالله!
بیر ایلدی، بیر آز چوخ دا اولور، یوخدی دماغیم
نه چاتیر الیم بیر ایشه، نه گئدیر ایاغیم
هر دن یئنی بیر سوز دانیشیر اوغلان- اوشاغیم
تاققیلدایر، آلله دا شاهیدی، قولاغیم
«پورت آرتور»، حریت، «مانجوریا» قاه- قاه
لا حول و لا قوة الا بالله!
آند اولسون اوتن گونلره، دیوانه اولوبلار
اسلامه ده، ایمانه ده بیگانه اولوبلار
بالله باشیم چیخماییر آیا نه اولوبلار
حریته- مریته مستانه اولوبلار
باه باه... گئنه باه باه... گئنه باه باه... گئنه باه باه
لا حول و لا قوة الا بالله!
آخ، آی کئچن ایللر، نولا بیر ده دولانایدین
تازه گئنه بئش یوز ایل اولونجا دایانایدین
علمی، ادبی، فضلی، کمالاتی دانایدین
ای بیلدیر، اینیش ایل، نولا اودلاره یانایدین!
تا ائیله مه ییدین ده بو غافل لری آگاه!
لا حول و لا قوة الا بالله!
بیلمم نه ایشیم واردی، باشیم هاردا قاریشدی
علم ایله بئله دوشمن اولان قوم باریشدی
تجدید وفابیرله معارفله ساریشدی
راحت یاتا بیلمم، منه غم موری داریشدی
ائتمکمی اولار بیر ده بو اویموشلاری اکراه؟
لا حول و لا قوة الا بالله!
میرزا علی اکبر صابر
گوزلرینین قاره سینه...................
سوگیلیم زولفون توکوبدور گینه اول شانه سینه
قوربانام زولفونه هم زولفو گزه‌ن شانه سینه
گئجه گوندوز گزرم دلبریمین کویینی من
چونکی یوخ منده لیاقت گئدم اول خانه سینه
دالیسیجان دوشرم فیکر و خیال ایلیه‌رم
دوشجکدیر پس هاچان سایه‌م اونون سایه سینه
حوری جنت ده گرک دیر گورورم حوری‌نی من
تا کی گوزلر ساتاشیر گوزلرینین قاره سینه
دوزدی غمزه اوخونون یاره‌سی کار ائتدی منه
لاکین آرزوم بو دی کی مرهم اولوم یاره سینه
من گونش اولسام اگر سنده گرک مهپاره