گزیب دولانــــــــــــاندا ائلی اوبانی
سینیق کونوللری شــــــاد ائله گیلن
چالیش اورتاق اولمــــا شره بهتانا
فیکرینی شیطاندان یاد ائلـــه گیلن
آراییب حقیقت آختار جـــــــــهاندا
یاخشی پیسه نظــــر ائله هر یاندا
ظالمکار الینده داردا قـــــــــالاندا
قارشی سیندا دایان داد ائله گیلن
یوسف سویله گیلن حـاق حقیقت
حاقدان خلق اولونوب بــــو شانلی خلقت
ایستسن کی باشین اولا سلامت
هر ایشده اللــــهی یاد ائله گیلن
انجمن ادبی فردوسی تبریز وبلاگینان کپی اولونموش
یوسف کوکبی
آتا بابا سؤزلری 14
خورُیین یاخشیسی حاضر اولانیدیر
خینالی اَل جیبه قویولماز
دئییلَجک سؤزو فیکیرلش، سونرا دئه
دئییلَجک سؤزو قارنیندا ساخلاما
دئییلمیش سؤزدن دئییلمَمیش یاخشیدیر
دئییلن سؤز یادیگاردیر
داتدلی سؤز دینلَنَر، دادسیز سؤز اَسنَدَر
دادسیز شوربایا دوز دا کار ائلَمَز
دادلی سؤز جان آرزوسو، داسیز سؤز باش آغریسی
دادماقلا مال توکنمز
دادمامیسان قاز اتینی نه بیلَسَ لذّتینی؟
داز کئچلدن خوشلانار
دازین ایستَدیگی قارا ساچ اولار
داش داشا سؤیکَنر دیوار اولار
داش دویوارین قولاغی وار
داش دَیَنه بللیدیر ، یول گئدنه
داش آت قوللارین آچیلسین
داش آتان بللی باش آتان بللی
داش آتانا چؤرک آت
داش آتیب باشینی توتوب
داش اورَکلی دوشمنین اورَگینی یارار یومشاقلیق
داش اوسته اکین اولماز
اش اولسایدی سیخاردیم ، تورپاغیدیم دایاندیم
داش اولما ، بوش اول
داش بیر یئرده قوز بیر یئرده
داش بیر یئرده قالانادا گؤیرر
داش داشی دیرناق داشا ، سیز ساواشا بیز تاماشا
داش داشی سیندیرماز
داش قیزلار باغرینا ، گئجه لر یالقیز یاتار
داش یومشاق نه اولسا یئیر( کنایه)
داش یومشالار ، دوشمن یومشالماز
داشلاردا دیله گلیر
داشی داشا ، باشی باشا وورارلار
داشین خیرداسی بؤیومز ، آدامین خیرداسی بؤیویر
داشینما سو اسله دَییرمان ایشلمَز
داغ ییخیلماسا دره دولماز
دالشینما سو ایله باغ سالینماز
دامازلیغینی یئین تامارزی قالار
دانیشانی آدام بیلیر، هورَنی ایت
من سنی سئویرم سنده منی سئو
من سنی سئویرم نازلی دیلبریم
گل سن ده بو ائلی بو وطنی سئو
سون منی عشقینده امتحانا چک
دوزگون عاشیق اولسام سن ده منی سئو
سئو گیلیم عاشیقم گول یاناقینا
شکر سؤزلرینه بال دوداقینا
قوی قدم شوقیله آرزی باغینا
من بیر شیدا بولبول سن چمنی سئو
بو ائلی بو دیلی بو وطنی سئو
من سنی سئویرم سنده منی سئو
علی میثمی
منه نه؟
آیریلیق اؤغور اولسون یؤلونا
بوندان سؤنرا سئومه ییندن منه نه؟
خاطیره مده گؤز یاشلارین قالاجاق
کینایه لی گولمه ییندن منه نه؟
هر گوناهی قباحتین بیلمه دین
محبّتین یولو چتین، بیلمه دین
بو سئوگی نین سعادتین بیلمه دین
بوندان سؤنرا بیلمه ییندن منه نه؟
خاطیره ن یؤخ عؤمروم بویو ساخلاییم
دیء، هارداسان، هر دن گلیب یؤخلاییم
گؤزلریمده یاش قالماییب آغلاییم
بوندان سؤنرا سیلمه ییندن منه نه؟
قؤپوب گئتدی سؤن اومیدین یارپاغی
حسرت اَکیب، درد بؤیودور تؤرپاغی
سن اؤلمادین دردلریمین اؤرتاغی
بوندان سونرا بؤلمه ییندن منه نه؟
بو سئوگی ده دوز سؤزونو گؤرمه دیم
اؤزگه اؤلدون هئچ اؤزونو گؤرمه دیم
ساغلیغیندا خوش اوزونو گؤرمه دیم
بوندان سؤنرا اؤلمه ییندن منه نه؟
نصرت کسمنلی
استفاده یئری
لبینده عاشقه اوْلسـایدی استـفاده یئــری
قدح ده قانه دؤنوب قالماز ایـدی باده یئــری
دیـار عشقـــه کؤنـول ، لا ابالی قوْیما قـــدم
بو بارگاهــه گئدر کــن ، بیــر اعتقــاده یئـری
اراده سیزلـره یئــر یوخــدو عشـق مولکـونده
خوشــا اوْل عاشقــه وار اوْنـدا بیر اراده یئری
شــراب مجـلسینه قوْیماییـن گله نده رقیــب
ده گیــل بو گوشـه جنت حــرام زاده یئــــری
سـنین گؤزللیگینین عاجـــزم افــاده ســـینه
مله کــدن اؤزگه سـنه تاپمـادیم افاده یئــری
تکبر اهلینی عشق ایچره ایسته مه ز جانان
طریـق عشقــه کـؤنـول ، دائمـاً فتــاده یئــری
دیــار عشقــــده واحـــــد ، هامی برابر دیـــر
بیلینمه ز اوْردا گــــدا ایله شاهـــزاده یئــری
اولماز
اگر اینسان حکیم اولسا ، اسیر روزگار اولماز
بو بئش گون عمره خاطیر ، نفس شومه دستیار اولماز
سلیمانلار گئدیبلر دست خالی قبره دونیادان
نقدیر اولسا اینسانین جلالی ، پایدار اولماز
شکوه و فر جاویدان ، فقط مخصوص سبحان دیر
اجل حکمی گلنده ، هئچ کسه راه فرار اولماز
بو سؤزلر منتسب دیر مکتب شاه ولایتدن
بویوردو ثروت و مکنت دلیل افتخار اولماز
بشرده اولسا حریت ، اؤزون دونیایه سیندیرماز
شرافتمند اولان اینسان ، قالار آج روشوه خوار اولماز
اگر اینسان بیر آز فیکر ائیله سئیدی متن قرآنه
بیلردی هئچ حقیقت پیشه اینسان ظلم کار اولماز
بلای فقر و نکبت دن قاچیرلار قیزلار ائولردن
مساوات اولسا، عدل اولسا ، بو قدری انتحار اولماز
بو بیر امر مسلم دیر ، درآمدلر حلال اولسا
بو قدری کوچه و بازارده بی بند و بار اولماز
گلین آی باشرافتلر ، چکیب تخت دن سالاخ فقری
برابر اولسا اینسانلار ، شرافت داغدار اولماز
گئدیرسن مکه یه هر ایل ، دئییرسن عاشقم حجه ؟
ولی مین حجه گئتسن ، هئچ بیرینده اعتبار اولماز
تبرا ائیله شیطاندان ، سورا گئت حجه ای حاجی
وگرنه مکه ده شیطانه ، شیطان سنگسار اولماز
اگر مین ایل اوروج توتسان ، همان قرآنه آند اولسون
اگر آج یاتسا بیر اینسان ، رضا پروردگار اولماز
غفاری اردبیلی
آتا بابا سؤزلری۱۳
تولکو وار باش قوپاریر ، قوردون آدی بد نامدیر
تویدان سونرا ناغارانین فایداسی اولماز
تویوغو بیر خالوار بوغدانین ایچینه سالسان ، یئنه ائشَلنمگی
ندن قالماز
تیکه قارین دویورماز؛ محبّت آرتیرار
جرگه دن قالان قوتور اولار
جیدانی اوغورلایان یئرینی بیلر
جیدانی چووالدا گیزلتمک اولماز
چؤمچه قازانین تکینی دئشیب
چؤمچه قازانین دیبینه دایاندی
چؤمچه قازانین دیبینه دَییر
اخیر پاخیر آچاندیر
چاخیری ایچ شیر بؤیرو ییرتماغا ، ایچمه قارغالار گؤزونو دَلسین
چاخیری تؤکسن سیچانین بوغازینا ، گئدر پیشیگین پئشوازینا
چاخیری تؤکسن کئچینین گؤتونه قوردون پئشوازینا گئدر
چاخیری کئچینین بوغازینا تؤکسن واریب داغلاری آشار
چاخیری لالا وئرسن لال دیل آچار
چاردا آلتیندا هر آرواد گؤزلدیر
چالخالاندیقجا زمان نئهره کیمی ، یاغ یاغ اوسته گئدیر ، یارما یاوان قالار
چوخ یئکه سیچیب ، باشیندان دا دیشلَییر
چوخ یوماقلا قارا پالاز آغارماز
چولاق آت سیّده نذیرئیر
چیراق اؤز دیبینه ایشیق وئرمز
حالین پیسدیر اؤل قورتار
حاییف قیمته قالماز
خارادا چالغی ، اورادا قالغی
خاراللارا سیغمایان جانیم ، توربا داغارجیغا سیخیلدی
خالتانی آسلان بوینونا وورمازلار
خورَگین دادی آغیزدادیر
خورَیی دویونجا یئمه ، گؤزون دالینجا قالماسین
گیزله نیب
اۆره‌ییمده نئچه – نئچه
یاس قارێیێب، وای گیزله‌نیب
هیمه بنددی گؤزله‌ریمده،
نئچه چئشمه، چای گیزله‌نیب
اۆره‌ییمی کیمه آچێم ؟
درد الینده‌ن هارا قاچێم ؟
دۇمان قوْیمۇر اێشیق یاچێم
بۇلودومدا آی گیزله‌نیب
داغلار آلتدا نله‌ر یاتێر،
یاتێر، داغ- دره‌له‌ر یاتێر.
ایچیمده نعره‌له‌ر یاتێر،
روحومدا هارای یاتیر
زلیم خان یوسف اوغلی یعقوب
بیز نییه سئومییه‌ک بیر - بیریمیزی
یئر گؤیۆ، داغ داغێ، داش داشێ سئودی،
تانرێ ناخێش وۇردو نقاشی سئودی،
گؤز گؤزه بوْیلاندێ، قاش قاشێ سئودی،
بیز نییه سئومییه‌ک بیر - بیر یمیزی،
چمه‌نله‌ر توْرپاغا خالی چکیرسه،
خالێدا یاشێلێ، آلی چکیرسه،
آری چیچه‌کله‌رده‌ن بالێ چکیرسه،
بیز نییه سئومییه‌ک بیر - بیر یمیزی،
اۇلدوزلار سایرێشێب گؤز وۇرۇر آیا،
چئشمه‌له‌ر چاغلایێب تؤکۆلۆر چایا،
سئوه‌نله‌ر گلیرسه هر گۆن دونیایا،
بیزنییه سئومییه‌ک بیر - بیر یمیزی،
گۆل شئهدیده‌ن گۆج آلێر، مامێر قایادان،
گؤز اوْد دان قێزارێر، چیچه‌ک هایادان،
سۆزۆلۆب گلیرسه کؤکده‌ن، مایادان،
بیز نییه سئومییه‌ک بیر - بیر یمیزی،
عؤمور گؤز قێرپیمی، فیرصه‌ت آزدێسا،
کؤنۆل سوْن نفس ده سێنان سازدێسا،
اۆچۆب الیمیزده‌ن گئدن یازدێسا،
بیز نییه سئومییه‌ک بیر - بیر یمیزی،
عؤمرۆن هم سئوینجی، هم آهێ وارسا،
پروانه یانغێسێ، شمع آهێ وارسا،
آده‌مین جننه‌ت ده طاماحی وارسا،
بیز نییه سئومییه‌ک بیر - بیر یمیزی،
یاغێش گؤزه‌للـه‌رین اؤپۆر اۆزۆنۆ،
داملا پێچیلتێلا دئییر سؤزۆنۆ،
شلاله قایادان آتێر اؤزۆنۆ،
طوفان داغێ سئویر، دالغا دنیزی،
بیزنییه سئومییه‌ک بیر - بیر یمیزی،
زلیم خان یوسف اوغلی یعقوب
ســن یاریمیـن قاصـدیســن
ســن یاریمیـن قاصـدیســن
ائیلـن سـنه چای دئمیشم
خیالینــــی گؤنــدریـــب دیر
بس کی من آخ وای دئمیشم
آخ گئجـــه لر یاتمامیشـــام
من سنه لای - لای دئمیشم
ســن یاتالـی مـن گؤزومـــه
اولدوزلاری سای دئمیشم
هرکس سـنه اولدوز دییــه
اؤزوم سـنه آی دئمیشــم
سنـــدن صـــوْرا حیاتــه مــن
شیرین دئسه زای دئمیشم
هر گؤزه ل دن بیر گول آلیب
سـن گؤزه له پای دئمیشـم
سنیـن گون تـک باتماغینــی
آی بـاتـانـا تـای دئمیشــــم
اینــدی یـایـا قیــش دئییــرم
سابق قیشا یای دئمیشم
گــه تویونــی یـاده سالیـــب
من دلی نای - نای دئمیشم
صوْنــرا گینــه یاســه باتیــــب
آغلاری های - های دئمیشم
اتـک دوْلــــو دریـــــا کیــــمی
گؤز یاشیـما چای دئمیشــم
عؤمره صـوره ن من قارا گـون
آخ دئمیشــم وای دئمیشــم
اوستاد شهریار
عجب غم خوارسیز قالدیم....
نه مدت دیر من بیچاره یا رب یار سیز قالدیم
پوزولدو رونقیم، داغیلدی ائو، پرگارسیز قالدیم؟
کیمه اظهار ائدیم دردیم ؟ هانی بیر محرم اسرار؟
غمیم چوخ، غمگساریم یوخ، عجب غمخوارسیز قالدیم
دریغا بیلمه دیم قدرین من اول یار وفادارین
عجایب سخت جانام، یارسیز، من عارسیز قالدیم؟
غم هجرانا یاندیردین منی، ای چرخ دون بسدیر
رحیم اسمینه آللاهین دئییم ، اقرار سیز قالدیم
نباتی توبه قیل ، ایمانا گل ، افسانه دانیشما
نولا بیر یول دئسه ن کی: یا علی! من یارسیز قالدیم
حکیم نباتی
عاشق اوْلان گؤزده گر ک خار اوْلسون
کیمدیر اول، سلسله عشقه گرفتار اوْلسون
تا کی کیفیت مجنونا خبردار اوْلسون ؟
جنتین حور و قصورو سنین اوْلسون زاهد
وارساغی سؤیلمه قوی دوست منه یار اوْلسون
پر و بالینا دگه ن عاشق بیچاره لرین
گؤروم ائودن ائشیگه چیخماق اوْنا عار اوْلسون
او پریچهره کی دائم منی بیمار ایستر
تانریدان ایسته میشم بیرده او بیمار اوْلسون
نه دوعادیر ائله دین یارا نباتی بیر اوتان
رسمدیر عاشق اوْلان گؤزده گره ک خار اوْلسون
حکیم ابوالقاسم نباتی
اسیر دام غم
ای اسیر دام غم، بیر گوشه میخانه توت
توتما زهّادین مخالف پندینی، پیمانه توت
دیشله دیمسه لعلین ای قانیم تؤکن قهر ائیله مه
توت کی قان ائتدیم، عدالت ایله قانی قانه توت
گر سنه افغانیمی بیهوده دئرسه مدعی
اوْل سؤزه توتما قولاق، من چکدیگیم افغانه توت
قیلمارام زنجیر زولفون ترکین ای ناصح منی
خواه بیر عاقل خیال ائت، خواه بیر دیوانه توت
ای اوْلوب سلطان دئیه ن دونیادا مندن غیری یوْخ
سن اؤزون بیر جغد بیل، دونیانی بیر ویرانه توت
ای فضولی دهر زالی نین فریبیندن ساقین
اوْلما غافل ارگیبی ترپن، اؤزون مردانه توت
حکیم فضولی
سنسیز
عشقین منی دؤندردی گولوم بولبوله سنسیز
کؤنلوم توتولار باخسـام اگـر بیر گولـه سنسیــــز
زولفـون اوجی گؤستــردی منه عشق کمنـــدین
دوشدوم یئنه مجنون کیمی دیلدن دیله سنسیز
بیر گون اوزونون هیجری بیرآی اوْلدو گؤزومــده
زولفوندن ایراق دؤندی گئجه م بیر ایله سنسیز
لیلاسـی ایچـون دؤزمـه دی بیـر محنته مجنــون
حق عاشقی یم دؤزموشم هر مشکله سنسیز
هر عاشقیــن اؤز یارینــه دیـــر میلی منیـــم ده
میلیم گوله یوْخدور هوسیم سونبوله سنسیــز
گؤزیاشـی ایله بسلــه دیگیـم نخـــل امیــــدیم
گلمه ز گؤزلیم مین گول آچا حاصله سنسیــــز
سن گؤرسن اگــر واحدی رحمین گلــر ای گـول
بیچــــاره ائدیر آه و فغان بیــــر بیلــه سنسیــــز
علی آقا اسکندر اف
آتا بابا سؤزلری ۱۲
پلنگه ات یئمگی ، کئچییَه اوت یئمگی اؤیرتمزلر
پول پولو قازانار پول پولو گتیرر
پول وئرسن ماللا منبردهن دوشر
پولو سایدیقجان آزالار
پیادا آتلییا گولر
پیادا گلندن آت آلماغی اؤیرنمه
پیرینی تانیمایانین عاقبتی پیس اولار
پیشیک آتاسینین خیرینه سیچان توتماز
پیشیک آرخاسینی یئره وورماز
پیشیک اؤلوب سیچانلارین بایرامیدیر
پیشیک ائودن چیخاندا ، سیچانلار باش قالدیرار
پیشیک بالاسی اؤزونو آناسینین دؤشونده گیزلَدر
پیشیگین دردی ایتی اؤلدورر
پیشیگین قانادی اولسایدی سئرچه دن علامت قالمازدی
پیشیگین گؤزو سیچان دئشیگینده اولار
تئز پاریلدایان تئزده سؤنر
تئز قاچان ،تئز یورولار
تارلادا ایزی اولمایاناین سفره ده اوزو اولماز
تازیسیز اووا گئدن ائوه دووشانسیز قاییدار
تازینی خالتاسی ایله تانییارلار
تازینین توپال اولدوغو دووشانین قولاغینا یئتیشیب
تانری ائششگی تانییب ، بوینوز وئرمَییب
تانری قورویانی قورد یئمز
تاوا دلیک یاغ توتماز ، تاختا چوروک میخ توتماتز
تاووس قوشونو توکونه گؤره کَسرلر
تجارت دوستلوق کؤرپوسودور
تَزه ائوه کؤچنده ، کؤهنه ائوین اوجاغیندا کول گؤتررلر
تقدیر ایله یازیلان ، تدبیر ایله پوزولماز
تک آغاجدان باغ اولماز
تک ال ایله دویون دویونلَنمز
تک الدن سس چیخماز
تک داشدان دووار اولماز
تک قویوندان سورو اولماز
تک گزن دانانی قورد یئیر
تکرار بیلگین آناسیدیر
تکلیک آللاها یاراشار
تکه ده قوچ هونری اولماز
تنبل داغدا قار گؤردو ، یورغانینا بوروندو
تنبل دیلنچی نین قارداشیدیر
توخ ایت آج بَی دن یاخشیدیر
توخ ایکن یئین، دیشی ایله اؤزونه قبیر قازیر
تورپاغین قاراسی اوز آغاردار
تورپاقنان اوینایان آج قالماز