گل
فرقتوندن یاندی باغریم اوره گیم قان اولدی گل
گل کی رخسارون بو مرده جسمه جان اولدی گل
دونیانین ناز و نعیمی، باغ و بستانی منه
سنسیز ای سولطان خوبان بند و زندان اولدی گل
ایستدی لعلین فراقی جانیمی یاخماق ولی
شوقه یانمیش جانه لعلین آب حیوان اولدی گل
اول کونول کی دایمن ایشی سنونله وصل ایدی
یاندی شوقوندان اسیر درد هجران اولدی گل
جانیمین جانی وصالیندور وصالوندان اونی
تا کی اییردی فلک بیچاره بیجان اولدی گل
عاشقین باغ و گولستانی اوزون گلزاریدیر
هانسی گولزارین گولی گول سوز گولیستان اولدی گل
جنتین صحنینده طوبی واله و حیران و مست
قامتون حسنونده ای سرو خرامان اولدی گل
تا منی تقدیر یزدان ایله دی سندن جدا
کونلومون حالی پریشان دیده گریان اولدی گل
معجزاتوندان یاناغون، محکماتوندان ساچون
خار و خاشاکی جهانین ورد و ریحان اولدی گل
بحر بی پایانه شوقون جانیمی غرق ایله دی
گؤر نه بیداد ایله دی هجرون نه طوفان اولدی گل
بو نسیمی سندن آیری بیلدیگیم یوخدور وجود
درد و درمان، وصل و هجران، جمله یکسان اولدی گل
نسیمی
فصل نو باهار
ساقیا دولدور قدح چون یئتدی فصل نو باهار
مرغزار اولدی چمن سویله ر چمنده مرغ زار
گول چمنده پادشاه اولدی بزتدی مجلسی
لاله گلدی قوللوغا توتدی شراب خوشگوار
صبحدم بستانه ساری گل گشت اوچون عزم ائیله دیم
باغچادا گوردوم کی چیخمیش بیر حبیب گلعذار
دیشی اینجو، گوزی جادو، خالی هندو، بئلی مو
ساچی سنبل، خالی فلفل، اوزی چون گل، آغزی دار
خوب منظر، گوزی کافر، کیپریگی خنجر، قاشی یای
قد صنوبر، بویی عرعر، لاله ی تر، شول نگار
یوزی نون و گوزی عین و اوزی ری قامت الف
ساچی جیم و خالی میم و یوزی نقطه خط غبار
دلبریم بیر قیل بهاسی قیمتی دورد اقلیمه
بیری مصره، بیری چین و بیری هند و بیری لار
معرفتدن کوثر اولدی هم «نسیمی» چاکری
نسبتی یوخدور اونونلا عین دین و اختیار
آتا بابا سوزلری ۷
اؤردک گلیب قاز اولماز، گلین گلیب قیز اولماز
اؤردَگی باغلاماغا ایپک گرک ، یار ایله اویناماغااورَک گرک
اؤردَگی سو ایله قورخوتمازلار
ائرمنی دن شاهید ایستَدیلر ، اوزوم آیاقلایان گتیردی
اؤز آدینی اؤزگه لره قویما
اؤز اؤزونه ائیلَیَنه چاره یوخدور
اؤز ائولرینین تولکوسو ، اؤزگه ائوینین آسلانی دیر
اؤز ائویمین نؤکرییَم ، اؤزگه ائوینین آغاسی
اؤز ائوینده اؤز باشینی باغلایا بیلمیر ، اؤزگه ائوینده گلین باشی باغلاییر
اؤز چؤرَگینی اؤزگه سوفره سینده یئمه
اؤز عاغلینی اؤزگه عاغلینا وئرمه
اؤز قدرینی بیلمَیَنین قدرینی اؤزگه سی ده بیلمز
اؤز قورو چؤرَییم ، اؤزگه نین پیلوووندان یاخشیدیر
اؤز کؤوشنینده اوتلایان مال آج قالماز
اؤز گؤزونده بایقوشون بالاسی ، تاووس قوشوندان دا گؤزلدیر
اؤز گؤزونده تیری گؤرمور، اؤزگه گؤزونده قیل سئچیر
اؤز گؤزونده دیرَگی گؤرمور، اؤزگه گؤزونده چؤپو گؤرور
اؤزو عدالتلی اولانین قاضییا احتیاجی اولماز
اؤزو قازانمایان مال قدرینی بیلمز
اؤزو ییخیلان آغلاماز
اؤزون باخما سؤزونه باخ
اؤزوندن قوّتلی ایله آیاق چکمه
اؤزونده اولمایاندا قونشویا گئدرسن ، قونشوندا اولمایاندا هارا گئدرسن ؟
اؤزونو یاستا بیلسن ، یولداشینی اؤلموش بیل
اؤزونو باشقاسینا نردیوان ائیلَمه
اؤزونه حرمت قویمایان ، اؤزگَیه ده حرمت قویماز
اؤزونه قییمادیغینی ، اؤزگیَه ده قییما
ائششک نه بیلیر زعفران نه دیر؟
اؤکوز اؤزونه یونجا اَکنده باشی آغرییار اؤکوز اؤلدو، اورتاق آیریلدی
اؤکوز اؤلر گونو قالار، ایگید اؤلر اونو( شهرت) قالار
اؤکوز اؤلمَیینجه اینگه قیمت اولماز
اؤکوز اولاجاق دانا پوخوندان بیلینر
اؤکوزو اولانا بورج گون وئرلر
اؤلموش آتا یوک چاتمازلار
اؤلموش آسلانا دووشانلار دا هجوم ائیلر
اؤلموش آسلاندان دیر کؤپک یاخشیدیر
اؤلموش دوه نین دریسی بیر ائششگه یوکدور
اؤلَنین بورجونو باققال دیریلره یوکلر
اؤلو آسلانین ساققالینی یولارلار
اؤلوسو اولان بیر گون آغلار ، دلیسی اولان هر گون آغلار
اؤلوم وار آرلوم کیمی ، اؤلوم وار ظولوم کیمی
اؤلونو بیر دفعه یویارلار
اؤلونون وصیّتی اؤزو ایله گئدر
ائله ائیله کی ، بیرده بازارا شور ساتان گلسین
ائله ایش توت کی، ایچیندن قنبر قولو چیخماسین
ائله باغین بئله ده مئیوه سی اولار
بوقاتار وصالدان حسرته گئدیر
بوقاتار وصالدان حسرته گئدیر،
وطن اوره ییمد ن غربته گئدیر.
دئیه سن آیری بیر قیسمته گئدیر،
نه اولار،ساخلا یین گئدن قاتاری.
گولوشوآپاریر،گؤزیاشیم قالیر،
اوره ییم بوشالیر،گؤزلریم دولور.
بو قاتارآیریلیق هاواسی چالیر،
نه اولار،ساخلایین گئدن قاتاری.
زامانی دوغراییب بیچیر بوقاتار،
سئوگیمین اوستوندن کئچیر بوقاتار.
منیم گؤز یاشیمی ایچیر بوقاتار،
نه اولار،ساخلایین گئدن قاتاری.
یویورسم،چاغیرسام چاتا بیلمه رم،
قلبیمدن قوپاریب،آتا بیلمه رم،
گئتدی می؟ بیر داها توتا بیلمه رم ،
نه اولار،ساخلایین گئدن قاتاری.
منیم باهاریمی آپاریب گئدیر،
الینی الیمدن قوپاریب گئدیر.
قویمایین یاریمی آپاریب گئدیر
نه اولار،ساخلایین گئدن قاتاری.
نصرت کسمنلی
بوعشقین یاسینی ساخلایاجاغام
بوعشقین یاسینی ساخلایاجاغام ،
سن گئدن یوللارا باخمایاجاغام .
آغلاسام گیزلیجه آغلایاجاغام .
منیم گؤز یاشیمی گؤرمه یه جکسن.
طالع اویونلارا آتاجاق سنی،
فریادین گؤیلره چاتاجاق سنین.
گوناهین گؤزونو توتاجاق سنین،
منیم گؤز یاشیمی گؤرمه یه جکسن.
او گولن شکلینه باخیب آغلاسام،
گؤزومه بیرعینک تاخیب آغلاسام.
اوزومو اووجوما سیخیب آغلا سام،
منیم گؤز یاشیمی گؤرمه یه جکسن.
سن ائله بیلمه کی،غمدن اوزاقسان،
بیر یاغیش آلتیندا سؤنن اوجاق سان.
اوزومه باخماغا اوتاناجاقسان ،
منیم گؤز یاشیمی گؤرمه یه جکسن.
نصرت کسمنلی
بوسه لبیندن
حسنون گؤزل آیت لری ای سئوگلی جانان
اولموش بوتون عالمده سنین شانینه شایان
گل ائیله عنایت منه وئر بوسه لبیندن
چونکی گؤزلین بوسه سیدیر عاشیقه احسان
سوردوم کی کؤنول هاردادی آلدیم بو جوابی
هئچ سورما تاپیلماز اونو آختارسادا انسان
رحم ائیله دئییب سیل کیمی گؤز یاشیمی تؤکدوم
گل قانیمله اَل یوما ای آفت دوران
انصافین اگر اولسا آچیق سؤیله «نظامی»
سنله نئجه رفتار ائلسین ای مهی تابان
گل سؤیله جوابین نه اولار سورغو زمانی
احوالیمی سندن سوروشارسا قیزیل اسلان
نظامی گنجومی
آتا بابا سوزلری۶
آجیقلی دیلَنچی نین تورباسی بوش قالار
آخیردا گولن یاخشی گولر
آخیرده گلن قاپینی اؤرتر
آدامین آغزی آشا چاتاندا ، باشی داشا دَیَر
آرالیق اویونون آرالیقدا اوینارلار
آرالیق سؤزو ائو ییخار
آرالیق مالی آرادا یئییلر
آرواد کیشینین قولتوق ساعاتی دیر
آرواد مالی قاب دستمالی
آروادا شریک اول، مالا شریک اولما
آریق آتا قویروغو دا یوکدور
آریق آتا یوک چاتمازلار
آریق آتدا تَپر چوخ ، یئریمَیه هونر یوخ
آریق اؤکوزه بیچاق اولماز( آریق اؤکوز کسیلمز)
آز اولسون ، دوز اولسون
آز یئه همیشه یئه
آزانچی چکر سویوغو ، موللا یئیر تویوغو
آزاندا گئت شیطان ائوینه
آستا آتین تَپیگی بَرک دَیر
آستا گئدن منزیل کسر
آستا گئدن یورولماز، یورویَن یولدا قالار
آشیق گؤردویون سؤیلر
آغاج بار وئردیکجه ، باشین آشاغی تیکر
آغاج توتان باش یاراندان چوخدور
آغاج گتیرَنین اوّل اؤزون وورارلار
آغاجین ایکی باشی وار
آللاه قوناغینین اؤز قسمتنی وار
آلیجی نین گؤزو ساتیجی دا اولار
آوازین یاخشی گلیر ، اوخودوغون اولسا! « قرآن »
• اؤ کوزو اولانا ، گؤن بورج وئرمزلر
اؤرتولو بازار دوستلوغو پوزار
ائرتَیه قالان ، بلادان قورخما ائرتَیه قالان ، آرخایا قالار
اؤردک اتین قاز اتین ، یئیَن بیلر لإّتین
حلقه اولدوق قاپیسیندا یئنه مئیخانه لرین
حلقه اولدوق قاپیسیندا یئنه مئیخانه لرین
بو حالیله یئتیشک وصلینه پئیمانه لرین
بیزخراباتا اوشاق واختی گلیب دؤشمه میشیک
کرپیچ اولدوق دیواریندا بو قدیم خانه لرین
دیلیمین خنجری عاشیقلری دوغرار گؤندوز
گئجه شمعیم یاخاجاق آتشه پروانه لرین
مشورتله آچیلیر سیرّی اگر دونیامیزین
من دئییم سنده چئویر تسبحینین دانه لرین
ایستریک تئز قوتارا صوحبتینی ایندی قلم
واقیف اوللوق حالینا سونرادا دیوانه لرین
خوابی غفلت آلاجاق آلسا بیزی آغوشونا
بیرجه آندا دؤشریک قوینونا افسانه لرین
او گوزللر ائله هوپموشدو بیزیم جانیمیزا
صائب اولدوق مایاسی بیزده بو بوتخانه لرین
صائب تبریزی
دیلبر
آی اوزلو نگاریم کیمه مهمان اولاجاقسان
بیر سویله کیمین شانینه شایان اولاجاقسان
شاهلیق چتری وار باشین اوستونده بو آخشام
عنبر چترینله کیمه سلطان اولاجاقسان
شکر دئمیرم من سنه اوندان دا شیرین سن
دلبر نئجه بیر بختوره جان اولاجاقسان
ظلمت گئجه سن نورلی چیراغ، پیس گوزه گلمه
ای آب حیات سن کیمه جانان اولاجاقسان
گئتدین نئجه بس تاب ائله سین هجره نظامی
او خسته ایکن، سن کیمه درمان اولاجاقسان
نظامی گنجوی
جمالیندیر نگاریستان
منیم ای نازلی دلداریم، منیم ای دردیمه درمان
منیم ای دولتیم، واریم، باغیشلا، گئچ گناهیمدان
سالاندا سن منی بنده، یاخینلیق اولماسا سنده
اگر قانیمی توکسنده، یولومدان دونمرم بیر آن
شیریندیر لبلرین دلبر، او گول رخسارینی گوستر
یازیق کونلوم سنی ایستر، منی الدن سالیر هجران
جمالین پرده یه سالما، بو عاشیقدن اوزاق قالما
اگوزومدن انتقام آلما، منی قویما بئله حیران
بدخشان لعلی سنسن یار، اوزون یاقوت کیمی پارلار
سنون حسنونده دیر گلزار، جمالیندیر نگارستان
منیم چین لیلی، عمر انسان، و یا بلقیس و صنعانسان
یادا بیر ماه کنعانسان، سنه اولسون جانیم قوربان
منی سن مجنون ائتمیش سن، حیاتدا محزون ائتمیش سن
اوزونه مفتون ائتمیش سن، ائدیبسن قلبیمی بریان
دئییردیم من سنین یارین؟ کی اولدوم ایندی بیمارین
سنین نورانی رخسارین، منی یاندیردی، ای جانان
نظامی اولدو بیچاره، ائدیب هجرانین آواره
تاپیلمیر دردینه چاره، اولوب جاری گوزوندن قان
نظامی گنجوی
سنه خاطر
قان یاش توکوب هجرونده گوزومده ببگیمده
قیرمیزدی قیزیل لالـــــــــه لریندن اتگیمده
گیتدون گوزلیم آتش هحــــرونده آلیشدیم
شمـــــع تک اریدیم سولدوباغیمدا چیچگیمده
آلالــــــــه بیتر قبریمین اوستونده گوررسن
زیراکه منیم دفن اولوب عشقیـــم اوره گیمده
بیلمم بو نه حکمت دی نه سیردى سنه خاطـــر
تیتریر جان ائویم لرزه له نیر تیردیــره گیمده
حسرت چکیـــــــرم بیر سنی رویاده گوریدم
افسوس که گلـــیب تنگه دیلیمده دیله گیمده
غملر گـــــمیسی غرق اولا جاقــدی کولگیمده
آتا بابا سوزلری۵
ائل مالی ایله دوست قازانیلماز
ائل مالینا کم باخان گوزلرینن قان دامار
ائل مالینا گوز تیکمه- اوزون قازان –اوزون یئه
ائل مالیناد گوز تیکن گوزسوز قالار
ائل مالینی قورو اوز مالین کیمی ناموسو ائله دوشر
ائل نغمه سینی ائلدن اویرنرلر
ائل هارا سن ده اورا
ائل همتیله-قوش قانادلا
ائل یاخشی_ بیز یامان –ائل بوغدا_ بیز سامان
ائل یاخشیلیغین اونوتماز
ائل یاندیران شامی (شمع) سوندورمک اولماز
ائل بیر اولسا داغ اوینادار یئردن
ائل یوموروغونو گورمین – اوز یوموروغونو باتمان سانار
ائلچی چوخ اولار- قیسمت آز
ائلچیسی گونوم اولان – باشینا کولوم اولار
ائلچیه اولوم یوخدو
ائلچیه زاوال یوخدو
ائلدن درس آلان لوغمان اولار
ائلدن گلسه ملامت –قالانماسان سلامت
ائلده اولان- بیگ ده اولماز
اولکه دن اوزاغ چیخان اوکوزون بوینوزون کسر لر
ائللر بیزه بیز ائللره
ائللر کوچر داغلار قالار
ائللر مین یاشار – بگ لر یوز
اولمک اولمکدی خیریلداماق نه دیر؟
اولن آدام دیریلمز
ائله آرخالانان ایگید باشا چاتار
ائله اولماسیدی بئله اولمازدی
ائله ترپن اوز ایاغین اوسته دورا بیلسن
ائله خانیم باجیم چئزر – بونا مگر تومان دوزر؟
ائله کی قوجالدین اوز یرین بیل
اولو دوروب مورده شور یویور
اولو قبریستانان قاییتماز
اولو قبیردن چیخماز
اولو قبیردن گئری قاییتماز
اولو قویون سوتلو اولار
اولو گرک تک قالماسین
اولو دن شیطان ال چکیب اینسان ال چکمیر
اولو ده بیر گون شوونی ده بیر گون
اولوسو اولن بیر گون آغلار دلیسی اولن هرگون
اولوسو اولن پاخیل اولار
اولوسیله دیریسی بیر دیر
سنبلوم
سنبلوم، سنبلوم، ساری سنبلوم!
آدینا سوز قوشوم باری، سنبولم!
ائللر حسرتی در بو امری وئرن،
شیرین گئجه لرده یوخوما گیردن
یاشیل تارلامیزین منظره سی در
خرمن اوستونده کی آنا سسیدر
سنبلوم، سنبلوم، ساری سنبلوم!
کونلومین قوناغی، یاری سنبلوم!
قاباقدان آل گییب گلنده بهار،
ائللر سنی آنار، سنی سلاملار
گوز اوسته یئرین وار بیزیم وطنده
بویوک بیر ئولکه نین گوزی وار سنده
سنبلوم، سنبلوم، ساری سنبلوم!
سنمی سن چیچگم، سنمی سن گلوم؟!
قالدیرسین باشینی گوگلره ساری
گنیش خرمنلرده درز تایلاری
باخدیقجا دشمنین گوزی قارالسین،
خزان یارپاغی تک اوزی سارالسین...!
آنا
بیر جوجوق ایدیم یئره گومدیلار سنی
حیاتا قانادسیز آتدیلار منی
باخ نئجه پوزولوب عمرین گلشنی
حیات سن سیز منه زنداندیر آنا!
قوینوندا بسله نر گوزل دیلکلر
لاییقدیر سجده یه سنه ملکلر
نرده سن، گوزلریم هپ سنی بکلر
باخ اولادین ناسیل گریاندیر آنا!
سن بیر گونش ایدین، دوغدوندا باتدین
یازیق اولادینی غملره آتدین
بیر جواب وئر، هانکی مرادا چاتدین
تورپاقلاردا نئچه زماندیر آنا!؟
بیر آه چکسم سنسیز قوپمازمی طوفان؟
عزیزیم آنا جان، گوزوم آنا جان
یوموق گوزلرینی آچ دابیر اویان
ایندی زمان باشقا زماندیر آنا!
ییخیلیب پایینه اولمک ایسته رم
آنالیق مهرینی گورمک ایسته رم
سنی گورمک ایچون اولمک ایسته رم
تسللیم آه ایله فغاندیر آنا!
صمد وورغون
آتا بابا سوزلری ۴
ائل آغیزی -چوال آغیزی
ائل آغیزی- یل آغیزی
ائل آغیزیلا قوش توتولماز
ائل آغیزی توربا دییل کی بوزسن
ائل آغیزی فالدیر
ائل آراسیندا ایت قویروغو کسمزلر
ائل آغیزی کرامت دیر
ائل آغزینا باخان آروادین تئز بوشار
ائل آغزیندا بیر سوزن یوز رنگی وار
ائل آغزینی باغلاماق اولماز
ائل اوچون آغلیان گوزدن اولور
ائل اوغلو یومورتایا قولوپ قویار
ائل ایچینده - اول ایچینده
ائل آیرانی یانغینی سویوتماز
ائل ایگیدلریله تانینار
ائل ایلن گلن قارا گون بایرامدیر
ائل ایله آلله اکبر
ائل ایله بیر آغلا ائلیله بیر گول
ائل ایله قارا گون بایرامدیر
ائل چاراسیز مرد یاراسیز اولماز
ائل چالان زورنانین سسی اوزاقدان گلر
ائل چالیشار- یئر سوینر-یئر بار ورر- ائل سوینر
ائل داغلارا دایانیب –چیراخلی ایندی اویانیب
ائل دلیسین چوله آتماز
ائل سوزو- آتا نصیحتی دیر
ائل سوزو آتالار سوزو
ائل سسی حاق سسی
ائل شامی(شمع) دائیم یانار
ائل عیبینی سنه دین- سنین عیبین ائله دئیر
ائل قاپیسی حکیم قاپیسی
ائل قارییب- توره سی قاریماییب
ائل قالخدی سن ده قالخ
ائل ائل کوچدو وبا قالدی
ائل کچن کورپو دن سن ده کچ
ائل گوزو یاخشی گورر
ائل گوزونن دوشمن بوی آتماز
ائل گوزویله دونیا گورونمز