فدا
جانیمین جوهری اول لعل گوهر باره فدا
عمرومون حاصلی اول شیوه رفتاره فدا
دردچکمیش باشیم اول خال سیاه قربانی
تاب گورموش تنیم اول طرّۀ طرّاره فدا
گوزلریمدن ساچیلان قطرۀ اشگیم گوهری
لبلریندن توکولن لولوی شهواره فدا
چاک سینمدن اولان قانلی جگرپاره لری
مست چشمینده اولان قانلی غمزۀ خونخواره فدا
پاره پاره دل مجروحی پریشانیمدن
سرکوینده اولان هر ایته بیر پاره فدا
جان و دل قیدینی چکمکدن ئوزوم قورتادیم
جانی جانانییه ائتدیم دلی دلداره فدا
ای فضولی نولا گر ساخلارایسم جانی عزیز
وقت اولارکیم اولا اول شوخی ستمکاره فدا
حکیم فضولی
دل زار سنه
غمدن ئولدوم دئمه دیم حال دلی زار سنه
ای گلی تازه روا گورمه دیم آزار سنه
ایچ مئی ناب که باغریندان ائدر جمله کباب
آتش عشق ایله عشاق جگرخوار سنه
مئی گلگوندا دگل نرگس مستین عکسی
قدح اولموش گوز آچیپ عاشقی دیدار سنه
عارضین گول گول ائدیبدر مئی گلگون تابی
وه که بیر گولدن آچیلمیش نئچه گلزار سنه
باغه سیرائدبورخ لعل ایله کیم غنچه و گل
گوستره خون دل و دیده خونبار سنه
دئرایدیم قامتینه سرو ولی ئوزگه ایمیش
حرکات و روش و شیوه و رفتار سنه
ائیله یب طرف بنا گوشینه درد دیلیمی
یا او طاقین دییه یا طرّۀ دستار سنه
من گرفتارینم و فتنه دن اولمان آزاد
هیچ کیم اولماسین ای شوخ گرفتار سنه
لعل نابین هوسی باغریمی قان ائیله دیگین
آه کیم قانلی یاشیم قیلمادی اظهار سنه
ای فضولی فلگین وار سنینله نظری
کیم غم و محنتینی وئردی نه کیم وار سنه
آتا بابا سوزلری۳
ائششک ائششگه اوزون قولاق دئیر
ائششک الومو یونجا دا
ائششک آنقیراندا ایتین باشی آغرییار
ائششک ایشلر آت یئیر
ائششک پالچیغا باتاندا اییه سیندن گوجلو اولماز
ائششک پیغامینن سو ایچمز
ائششک تاپیلاندا یوک ووران چوخ اولار
ائششک قاپدیغی یووشانی تانیار
ائششک نه بولور خورمانین دادینی
ائششک یا اودونا گئدر یا سویا
ائششک یوک آلتیندا آنقیرماز
ائششک یوکه گلمسه یوکو آپار ائششیه ساری
ائششگه آلتون یوکو وورسان گینه ائششک دی
آئشیدمک گدرمگه بنزمز
ائشیدن گورنه خبروئریر
اشیک قار ایچری دار
اشیگه چیخار دازالاق ائوه گیرر مازالاق
اوگئیک دولتدی اولسا اوز ائوین آباد ایلر
ائل اوز دلیسین یاخشی تانیار
ائل ائل اوسته سیغینار
ائل ائلیله گچینمیش قارداش قارداشینان گچینممیش
ائل آتان داش اوزاغا دوشر
ائل آتان داشا گوج چاتماز
ائل آتانی _ار آتار – ائل توتانی ار توتار
ائل آتانی حاق دا آتار
ائل آداما زینت دیر
باهار اولدی
باهار اولدی گل ای دلبر تماشا قیل بو گلزاره
بوراخدی غنچه لر پرده، بشارت بولبول زاره
شقایق پرده دن چیخدی بویاندی باغ ایله بستان
ایرشدی گلشنی حسنون بویاندی رنگ ازهاره
م
نی منع ائتمه ای زاهد، گوونمه ذکره ای صوفی
کی سن مغرورسان ذکره منم مشتاق دیداره
کی هر بلهم اضل بیلمز ندور کی عشقین احوالی
ایرشمز قاصرین عقلی بو مغلق سر اسراره
عبیر و مشک و عنبر تک ریاحین دن چمن دولدو
سحرده طعن ائده ر ساچون نسین مشک تاتاره
کی چیخدی غنچه دن سنبل گریبان چاک ائده ر من تک
دلیندی غصه دن باغریم، سن ائتمه اوره گیم پاره
چمنلر مختلف اولدی هزار الوان چیچک لردن
آچیلدی نرگس و لاله و نسرین، شکوفه گلدی اشجاره
آچیلدی نرگس و لاله توتوبدور یاسمن چادر
سؤیودلر ارغوان تیتره ر، قمیشلر یئتدی انهاره
بنفشه گول تماشاسی غنیمت بیل کی بئش گوندور
ساتار معشوقه گول حسنون خریدار اول بو بازاره
ییغیلدی جانینا جانی، دمی عیسی نسیمی نین
وصال دردینه درمان ایرشدی جان بیماره
مولانا نسیمی
عشق دیر
قد انار العشقُ للعشّاقٍ منهاج الهدا
سالک راه حقیقت عشقه ائیلر اقتدا
عشق دیر اول نشئه ی کامل کیم آندان دیر مدام
مئیده تنویر حرارت، نئیده تاثیر صدا
وادی وحدت، حقیقتده، مقام عشق دیر
کیم مشخص اولماز اول وادیده سلطاندان گدا!
ائیله مز خلوت سرای سرّ وحدت محرمی
عاشقی معشوقدن، معشوقو عاشقدن جدا
ای کی اهل عشقه سؤیلرسن ملامت، ترکین ائت
سؤیله کیم، ممکون مودور تغییر تقدیر خدا؟
عشق کلکی چکدی خط، حرف وجود عاشقه
کیم اولا ثابت، حق اثباتینده نفی ماعدا!
ای فضولی انتها سیز ذؤوق بولدون عشقدن
بؤیله دیر هر ایش کی حق آدیله قیلسان ابتدا
حکیم فضولی
تاریم منیم
سیزلاییر احوالیما صبحه قدر تاریم منیم
تکجه تاریم دیر قارا گونلرده غم‌خواریم منیم
چوخ وفالی دوستلاریم واردیر، یامان گون گلجه‌یین
تاردان اوزگه قالماییر یار وفاداریم منیم
یئر توتوب غمخانه ده، قیلدیم فراموش عالمی
من تارین غمخواری اولدوم، تار غم‌خواریم منیم
گوزلریمه هر تبسم سانجیلیر نئشتر کیمی
کیپریگی خنجردی، آه، اول بی وفا یاریم منیم
آسمان آلدی کناریمدان آی اوزلو یاریمی
یاش توکر اولدوز کیمی بو چشم خون‌باریم منیم
ای بو غملی کونلومون تاب و توانی، سویله بیر
عهد و پیمانین نه اولدو، نولدو ایلغاریم منیم
شهریارم گر چی من سوز مولکونون سلطانی‌یم
گوز یاشیمدان باشقا یوخدور در شهواریم منیم
اوستاد شهریار
لاله ده من ده
بیر غم ده اوره ک داغلامیشیق لاله ده من ده
بیرغنچه ده قان آغلامیشیق ژاله ده من ده
گوم گوی گوگریب زانباقین آرخ اوسته جمالی
زانباق دا یانیر عشق اودونا لاله ده من ده
ساپ ساری سارالمیش اوزوم آلاله مثالی
بیر دلبره مفتون اولوب آلاله ده من ده
قیپ قیرمزی گول تک قیزاریر اوزده یاناق لار
حسرت له باخیر گول اوزه محتاله ده من ده
گلشن ده چمن یام یاشیل افغانیده بولبول
بولبول ده گلیب تنگه داخی ناله ده من ده
آغ آپپاق آی اوسته توکولوب قاپ قارا زولفون
حیرت له باخیر آی اوزوده هاله ده من ده
من "یوسف" عشقم یانیرام عشقین اودوندا
نورس ده یانیر عشق ده صد ساله ده من ده
دکتر یوسف معماری
احسان اولسون
گویلومی ایسته سه هر کیمسه هراسان اولسون
اودا من تک گوروم آخیرده پریشان اولسون
مین گویول حسرت نانیله پریشان اولسا
قویمارام دلبریمین زلفی پریشان اولسون
هر کیم ایستیر وطنیندن قاچا دیوانه کیمین
تا اولونجه قالا غربتده، مسلمان اولسون
مومن کامل ایدیم بنده فراوانلیغدا
کافر اولدوم، بو گرک کی باهالیقدان اولسون
بوش یئره خلقه پلو وئرمه، منیم حقیمی وئر
شول الذمه ده دن ارواحینا احسان اولسون
گورورم شوقه گلیبسن دالین ایستیر حجمت
واقتی واردیر، هله قوی ماه حزیران اولسون
گئده!، من زورایله خلقین یولونی کسمه میشم
بوردا کئچمیر عملی، عازم تهران اولسون
منه لازیمدی اوباشدانه پلو، شامه کباب
سنده سعی ائیله قازان، سفره ده شوربان اولسون
گرچه اون دانه یلیم واردی ماهوت تره زری
حاجی سئومیر دئییر از مخمل کاشان اولسون
موعدی کئچمیش بولارین ایسته میرم ای خیاط
منه بیر یل تیکه سن اگنیمه چسبان اولسون
لکن اما سنه بیر یل تیکه رم تهرانی
حاجی خوشلانسا گرک مزدی فراوان اولسون
بئله شئیلرده حاجی، کان سخاوتدی باجی
وئره جک ایسته دیگین هر نئچه تومان اولسون
فقط اما کاسیبا بیر قره تنبل وئرمز
گرچه باشدان آیاغا پیکری عریان اولسون
یوخسول همسایه سنین حالینی گورمور مطلق
بئله دولتلی گرک قانینا غلطان اولسون
«معجزین» اولماسا افطاره کبابی- آشی
قورخورام خاچ سالیب بوینونا، آلمان اولسون
معجز شبستری
یار قاصدی
سن یاریمین قاصدی سن ایلن سنه چای دئمیشم
خیالینی گوندریب دی بسکه من آخ وای دئمیشم
آخ! گئجه لر یاتمامیشام من سنه لای_لای دئمیشم
سن یاتالی من گوزومه اولدوز لاری سای دئمیشم
هر کس سنه اولدوز دئیه ئوزوم سنه آی دئمیشم
سندن سونرا حیاته من شیرین دیسه زای دئمیشم
هر گوزلدن بیر گول آلیب سن گوزه له پای دئمیشم
سنین گون تک باتماغیوی آی باتانا تای دئمیشم
ایندی یایا قیش دئییرم سابق قیشا یای دئمیشم
گاه طویووی یاده سالیب من ده لی نای _نای دئمیشم
سونرا یئنه یاسه باتیب آغلاری های های دئمیشم
اتک دولی دریا کیمی گوز یاشیماچای دئمیشم
عمره سورن من قره گون آخ دئمیشم وای دئمیشم
اوستاد شهریار
گئتمه ترسا بالا سی
اذن
وئر توی گئجه سی من ده سنه دایه گلیم
ال قاتاندا سنه مشاطه تماشایه گلیم
سن بو مهتاب گئجه سی سئیره چیخان بیر سرواول
اذن وئر من ده دالونجا سورونوب سایه گلیم
منه ده باخدین او شهلا گوزوله من قارا گون
جرئتیم اولمادی بیر کلمه تمنایه گلیم
من جهنم ده ده باش یاسدیقا قویسام سنیله
هئچ آییلمام کی دوروب جنت ماوایه گلیم
ننه قارنیندادا سنله اکیز اولسیدیم اگر
ایسته مزدیم دوغولوب بیز ده بو دنیایه گلیم
سن یاتیب جنتی رویاده گورنده گئجه لر
من ده جنتده قوش اوللام کی او رویایه گلیم
قیتلیغ ایللر یاغشی تک قورویوب گوز یاشیمیز
کوی عشقونده گرک بیرده مصلایه گلیم
سن ده صحرایه مارال لار کیمی بیر چیخ نولی کی
من ده بیر صیده چیخانلار کیمی صحرایه گلیم
آللاهوندان سن اگر قورخمیوب اولسان ترسا
قورخورام من ده دونوب دین مسیحایه گلیم
شیخ صنعان کیمی دونقوز اوتاریب ایللرجه
سنی بیر گورمک ایچون معبد ترسایه گلیم
یوخ صنم!آنلامادیم,آنلامادیم,حاشا من
بوراخیم مسجدیمی سنله کلیسایه گلیم
گل چیخاق طور تجلایه سن اول جلوه ی طور
من ده موسی کیمی او طوره تجلایه گلیم
شیردیر شهریارین شعری الینده شمشیر
کیم دئیه ر من بئله بیر شیرله دعوایه گلیم؟
اوستاد شهریار
گئجه لر
دوت الیمدن بوهمان الدی فراقینده سنون
یادیمه سالماق همان باشه چالاردیم گئجه لر
حسن رخساری رویاده چکردیم قلمه
قلبیمی قاب ائلیوب قابه سالاردیم گئجه لر
بونا خاطر کی آدین دوشمیه اغیار الینه
دوزکیمی آدیوی یازدیقجا یالاردیم گئجه لر
بئله سیزلاردی اوره ک یادینا سالدیقجا سنی
قوش کیمی یئرده دوشردیم چاپالاردیم گئجه لر
بلکه سن ساغ یاشییب ساغ دولانیب ساغ گزه سن
گوزه لیم هر قادان اولسایدی آلاردیم گئجه لر
سن رقیبیمله گونوز سیره چیخاردین چمنه
منده عشقینده سولاردیم سارالاردیم گئجه لر
گوزلرین یادیمه دوشدوکجه اسه ردی بدنیم
سینه می دیرناق آتاردیم پارالاردیم گئجه لر
تابلو اوستونده چکردیم سنی مین زحمتیلن
بیر باخیب اوستونه تئز رنگی جالاردیم گئجه لر
ایندی ده گئتمه لیسن گئت دئموروم من ده گلیم
قاللام اول حالدا کی اولده قالاردیم گئجه لر
مکتب عشقیده مجنونئله من باهم ایدیم
غم ییغاردیم سینمه غصه قالاردیم گئجه لر
مجنون ئوز عشقینی لیلایه گوره بیلدیردی
من گونوز یازدیقیم عشقی قارالاردیم گئجه لر
اوستاد هوشنگ جعفری
آتا بابا سوزلری ۲
اپمیین یوخدور-نازلاماغین یوخدور-قوری قوری دیشلمیین وار
اپوش اوپوشی گتیرر گوموش گوموشی
اوتوب کچن عوموردور قوجالان اینسان!
اوردک گازکیمی یریسه جرجنک اولار
اوردک گاز یریشی یرییه بیلمز
اوردیین بوغازینی چوخ اوزادسان قاز اولار
ائرکک قوشون یوواسی اولماز
اوز اوستیراغینا تبیک آتیر!!!!!!!!!
اوز بیلدیگین دده سینه ده ورمز
اوز داناسین سوواریر
اوز سیرینی اوزوه ساخلا کی اوزگه ساخلاماز
اوز عیبینی گورن اوزگیه طعنه وورماز
اوز قیزیلیمیزی اوتوروب اوزگنین گیلینه گدریک
اوز گوزونده تیری گورمز –اوزگنین گوزونده چوپوگورر
اوزگوجونه آتین کیشنتمیر
اوز یاشینا گوره هامیا ساییق
اوزباشیمی بزمیشدین –تویدا گلین باشی قالمیشدی
اوزگه آتینا مینن تئزدوشر
اوزگه اغزینا باخان آج قالار
اوزگه الی ادامین خیرینه اوزانماز
اوزگه الینده کومبه بویوک گورونر
اوزگه اوشاغیندان اوغول اولماز
اوزگه ایپیله قویویا دوشمه
اوزگه باشیندا دللک لیک اویرنیر
آتابابا سوزلری۱
ال الدن اسگون اولور
ال الدن قالماز دیل دیلدن
ال الی تانیار
ال الی یوبار-الده دونوب اوزی یوبار
ال الین اورتوبو دور
ال اوزادیلان یره ایاغ اوزادیلماز
ال اوزانان یره دیل اوزانماز
ال اوسته اللر وار
ال ایشلر باش بویورار
ال ایله آچیلان دویونی دیشیوه سالما
ال ایلن قاباق آچیق گرک
ال ایلن هر نه ورسن او سنه گلر
ال ایلن آلینمایان اللی ایل قالار
ال ایله پوسته نین آغزینی خندان ائلمک اولماز
ال ایله جیبین آراسندا نه وار؟
ال بش بارماقدیر هرسی بیر بویدا
ال توتار گوز گورر
ال توتانین الیندن توتارلار
ال قولدان قوت الار
ال قیلینجا گدنده آغلین سسی باتار
ال کسنین الین کسرلر
ال گوزدن اوزاق- دیل باشدان
ال مرد اولار –دیل نامرد
ال میزان گوز ترزی
ال وریر اتک ورمیر
الیله ودیگین آیاغینن آلابیلمیر
ال بوش اوزو قارا
الی قولونان اوزوندور
یار آغلادی
یاری بویون قوجاخلادیم
یار آغلادی من آغلادیم
ییغیشدی قونشولار بوتون
جار آغلادی من آغلادیم.
باشیندا قار قالان داغا
دانشدیم آیریلیق سؤزون
بیر آه چئکیب باشینداکی
قار آغلادی من آغلادیم.
"طاریم"دا نار آغاجلاری
منی گؤروب دانیشدیلار
بویومو زیتون اوخشادی
نارآغلادی من آغلادیم.
ایله کی اسدی بیر خزان
تالاندی گوللریم منیم
خبر چاتینجا بولبوله
خار آغلادی من آغلادیم.
اوره ک سؤزون دئدیم تارا
سیملر اولدو پارا پارا
یاواش یاواش سیزیللادی
تار آغلادی من آغلادیم.
دئدیم کی حق منیم کی دیر
باشیمی چئکدیلر دارا
طنف کسنده بوینومو
دار آغلادی من آغلادیم .
"جعفری" یم بویوم بالا
غم اورک ده قالا قالا
یار جانیمی آلا آلا
یار آغلادی من آغلادیم.
" اوستادهوشنگ جعفری"
یاشیل آغاج
کؤک اوسته بوداغی نئچه دی بیلدیم
بوداغدا یار پاغی نئچه دی بیلدیم
سا لخیمی ساچاغی نئچه دی بیلدیم
بو یاشیل آغاجین آلتی بیزیم دیر.
ساچاغی تیترشیر تئللرین کیمی
یارپاغی اویناشیر اللرین کیمی
آچیلیب دویمه سی توللرین کیمی
بو یاشیل آغاجین آلتی بیزیم دیر.
سو ایچر سئوگینین کؤکو عؤموردن
سئوگی ال اوزمه سین تکی عؤموردن
خوش بیر خاطیره دیر ایکی عؤموردن
بو یاشیل آغاجین آلتی بیزیم دیر.
بو سئوگی، بولایلای، بو بئشیک بیزیم
چکر نوبه میزی بو کئشیک بیزیم
نه ییمیزه لازیم ائو ائشیک بیزیم؟
بو یاشیل آغاجین آلتی بیزیم دیر.
اوجاق آللاهین دیر ایستی آللاهین
آتش آللاهین دیر توستی آللاهین
بو یاشیل آغاجین اوستو آللاهین
بو یاشیل آغاجین آلتی بیزیم دیر.
کؤنلو موز هاوالی گؤزوموزده آج
گنجلیگین هاواسی با شیمیزدا تاج
بیرسنسن بیرمنم بیر یاشیل آغاج
بو یاشیل آغاجین آلتی بیزیم دیر.
دن کیمی سپه له توخوم کیمی اَک
زلیم خان بو آنین لذ تینی چک
هله بیزدن سونرا چوخو دییه جک
بو یاشیل آغاجین آلتی بیزیم دیر.
"زلیم خان یعقوب"